لاہور: وزیر اعلی پنجاب مریم نواز نے دنیا کو اسلام کے حقیقی تشخص سے روشناس کرانے کی ضرورت پر زور دیتے ہوئے کہا ہے کہ اسلاموفوبیا عالمی امن و بین المذاہب ہم آہنگی کیلئے سنگین خطرہ ہے، مسلمانوں کو درپیش امتیازی سلوک قابل مذمت ہیں ،ہر قسم کی منافرت کیخلاف آواز بلند کرنا ضروری ہے،اقوام متحدہ و دیگر عالمی ادارے نفرت انگیز رویوں کیخلاف موثر اقدامات کریں،مذہبی ہم آہنگی ،اقلیتوں کے احترام کو فروغ دینے کیلئے ہر ممکن اقدامات کررہے ہیں۔
انسداد اسلاموفوبیا کے عالمی دن پر جاری بیان میں مریم نواز نے کہا کہ اسلام دین رحمت ہے جو امن، محبت، برداشت اور انسانی عظمت کا درس دیتا ہے لیکن بدقسمتی سے اسلام اور مسلمانوں کے خلاف پروپیگنڈا تیزی سے فروغ پا رہا ہے۔
انہوں نے اسلاموفوبیا کو عالمی امن اور بین المذاہب ہم آہنگی کیلئے سنگین خطرہ قرار دیتے ہوئے کہا کہ اس کے خاتمے کیلئے ہر ممکن کوششوں کو سراہا جانا چاہئے۔ انہوں نے کہا کہ دنیا بھر میں مسلمانوں کو درپیش امتیازی سلوک، نفرت اور تعصب قابل مذمت ہیں،پاکستان نے اقوام متحدہ کی جنرل اسمبلی میں اسلاموفوبیا کیخلاف قرارداد پیش کر کے مسلمانوں کی آواز بلند کی جو قابل ستائش قدم ہے۔
انہوں نے اقوام متحدہ و دیگر عالمی اداروں سے مطالبہ کیا کہ وہ نفرت انگیز رویوں کیخلاف موثر اور یقینی اقدامات کریں،اقوام عالم کو چاہئے وہ کشمیر، فلسطین اور دیگر خطوں میں مسلمانوں کے جان، مال، حقوق اور عزت و وقار کے تحفظ کو یقینی بنائے۔مریم نواز نے کہا کہ پنجاب حکومت مذہبی ہم آہنگی اور اقلیتوں کے احترام کو فروغ دینے کیلئے ہر ممکن اقدامات کر رہی ہے۔
انہوں نے اس عزم کا اعادہ کیا کہ ایسا پنجاب تشکیل دیا جائے گا جہاں ہر مذہب اور مسلک کو مساوی حقوق اور عزت حاصل ہو۔انہوں نے کہا کہ دنیا کو اسلام کے حقیقی تشخص سے روشناس کرانے کی ضرورت ہے تاکہ اسلاموفوبیا کے اثرات کا خاتمہ کیا جا سکے۔ انہوں نے کہا کہ ہر قسم کی منافرت کیخلاف آواز بلند کرنا ضروری ہے ،پائیدار عالمی امن کے قیام کیلئے سب کو اپنا کردار ادا کرنا ہوگا۔
