اسلام آباد: وزیراعظم شہباز شریف نے یورپی یونین کیساتھ تعلقات مزید مضبوط بنانے کی خواہش کا اعادہ کرتے ہوئے ملک سے دہشت گردی کی عفریت کے خاتمے کیلئے پاکستان کے پختہ عزم کا اظہار کیا ہے۔جمعہ کو وزیراعظم شہباز شریف سے یورپی یونین کی سفیر ڈاکٹر ریناکیونکا نے ملاقات کی جس میں دوطرفہ امور پر تبادلہ خیال کیا گیا۔وزیراعظم نے بلوچستان میں جعفر ایکسپریس ٹرین پر حالیہ دہشت گردانہ حملے پر تعزیت کا اظہار کرنے پر یورپی یونین کی سفیر کا شکریہ ادا کیا اور ملک سے دہشت گردی کے عفریت کے مکمل خاتمے تک اس کیخلاف جنگ جاری رکھنے کے پختہ پاکستانی عزم کا اظہار کیا۔
وزیراعظم نے کہا کہ پاکستان اور یورپی یونین کے درمیان دیرینہ دوستانہ تعلقات ہیں۔ وزیراعظم نے دوطرفہ تعلقات میں مثبت پیشرفت پر اظہار اطمینان کیا اور پاکستان کی یورپی یونین کیساتھ تعاون پر مبنی شراکت داری، بالخصوص جی ایس پی پلس سکیم جس نے اپنے آغاز سے ہی پاکستان اور یورپی یونین کو بھرپور فائدہ پہنچایا کو مزید مضبوط بنانے کی خواہش کا اعادہ کیا۔
دونوں رہنماؤں نے انسانی حقوق سمیت پاکستان اور یورپی یونین کے تعلقات کے مختلف پہلوؤں پر بھی تبادلہ خیال کیا۔ وزیراعظم نے مئی میں اسلام آباد میں منعقد ہونیوالے پہلے پاکستان۔
یورپی یونین کے اعلی سطح بزنس فورم کے انعقاد کا خیرمقدم کیا اور یورپی یونین کی سفیر کو تقریب کو کامیاب بنانے میں پاکستان کے مکمل تعاون اور سہولت کا یقین دلایا۔ اس موقع پر یورپی یونین کی سفیر نے وزیر اعظم کو یورپی یونین کے وفود کے حالیہ پاکستان کے دوروں کیساتھ ساتھ آئندہ دوروں کے بارے میں آگاہ کیا۔
