اسلام آباد: وزیراعظم شہباز شریف نے دانش یونیورسٹی کو عالمی معیار کی ٹیکنیکل اینڈ اپلائیڈ یونیورسٹی بنانے ،وائس چانسلر کی تعیناتی اور بورڈ آف ٹرسٹیز کی نامزدگیوں بارے کمیٹیاں تشکیل دینے کی ہدایت کرتے ہوئے کہا ہے کہ دانش یونیورسٹی ایسی درسگاہ ہو گی جہاں مستحق،لائق طلبا کو اعلی تحقیق پر مبنی تعلیم سے دی جائے گی،ادارہ نوجوان نسل کے مستقبل کو سنوارنے کیلئے اہم سنگ میل ثابت ہوگا۔
جاری بیان کے مطابق منگل کو وزیراعظم شہباز شریف کی زیر صدارت دانش یونیورسٹی آف اپلائیڈ اینڈ ایمرجنگ سائنسز کی اسٹیئرنگ کمیٹی کا اجلاس ہوا جس میں دانش یونیورسٹی کو عالمی معیار کی ٹیکنیکل اینڈ اپلائیڈ یونیورسٹی بنانے کی ہدایت کی گئی۔ اجلاس میں وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر تعلیم و فنی تربیت ڈاکٹر خالد مقبول صدیقی ، وفاقی وزیر اطلاعات عطا اللہ تارڑ ،متعلقہ اعلی سرکاری افسران نے شرکت کی۔اجلاس کو دانش یونیورسٹی اور سکولز بارے بریفنگ دیتے ہوئے بتایا گیا کہ دانش یونیورسٹی کیلئے سیکٹر ایچ 16 میں زمین کا انتخاب کیا گیا ہے، دانش یونیورسٹی کی رجسٹریشن سیکشن 42کمپنی کے طور پر کی جائے گی جس کیلئے تمام ضروری معاملات چند ہی روز میں مکمل ہو جائیں گے جبکہ یونیورسٹی کے پیٹرن وزیراعظم پاکستان ہوں گے۔شرکاء کو بتایا گیا کہ دانش یونیورسٹی کے امور دانش ٹرسٹ کے زیر تحت ہوں گے تاکہ ادارہ اپنے مالی امور میں خود مختار ہو اور اس میں حکومتی عمل دخل کم سے کم ہو۔
اجلاس کو بتایا گیا کہ شگر، گلگت اور باغ میں جلد ہی دانش سکولز کا سنگ بنیاد رکھا جائے گا۔آزاد جموں و کشمیر کے علاقے نیلم ویلی اور کراچی کے پسماندہ علاقوں میں بھی دانش سکولز کا قیام عمل میں لایا جائیگا۔
اجلاس کے شرکاء سے گفتگو کرتے ہوئے وزیراعظم نے کہا کہ دانش یونیورسٹی ایک ایسی درسگاہ ہو گی جہاں مستحق اور لائق طلبا کو اعلی درجے کی تحقیق پر مبنی تعلیم سے آراستہ کیا جائے گا۔وزیراعظم نے یونیورسٹی کیلئے اسلام آباد میں زمین کے حصول کیلئے قانونی تقاضے ،یونیورسٹی کے چارٹر و دیگر قانونی معاملات جلد از جلد مکمل کرنے کی ہدایت کی۔ وزیراعظم نے دانش یونیورسٹی کو عالمی معیار کی ٹیکنیکل اینڈ اپلائیڈ یونیورسٹی بنانے کی ہدایت بھی کی۔
انہوں نے ہدایت کی کہ یونیورسٹی کی عمارت میں سادگی کا عنصر نمایاں ہو، عمارت کو سرخ اینٹوں سے تعمیر کیا جائے ،لاگت کم سے کم رکھنے کیلئے کوئی غیر ضروری خرچ نہ کیا جائے ۔ انہوں نے کہا کہ یونیورسٹی کیلئے اعلی تعلیم یافتہ اساتذہ اور فیکلٹی کو بھرتی کیا جائے گا، دانش یونیورسٹی جدید ٹیکنالوجی اور جدید تحقیق کے حوالے سے تمام آلات سے آراستہ ہو گی۔
انہوں نے ہدایت کی کہ دانش یونیورسٹی کا نصاب جدید اور بین الاقوامی معیار کے مطابق ترتیب دیا جائے۔وزیر اعظم نے یونیورسٹی کے وائس چانسلر کی تعیناتی کے حوالے سے سرچ کمیٹی تشکیل دینے اور بورڈ آف ٹرسٹیز کی نامزدگیوں کی حوالے سے کمیٹی تشکیل دینے کی ہدایت کی۔
وزیراعظم نے کہا کہ دانش یونیورسٹی کو ایسا ادارہ بنائیں گے جو دنیا میں نام پیدا کرے گی، یہ ادارہ نوجوان نسل کے مستقبل کو سنوارنے کیلئے اہم سنگ میل ثابت ہوگا۔انہوں نے کہا کہ ہم اس کو اپلائیڈ سائنسز کی یونیورسٹی بنائیں گے جہاں قوم کے بچے ،بچیوں کو بہترین تعلیم مل سکے گی، پاکستان اور دنیا میں بہترین اساتذہ اور ڈاکٹرز کو یہاں مدعو کیا جائے گا۔
انہوں نے کہا کہ منصوبے کا تخمینہ 190ملین پاؤنڈ ہے، 190ملین پاؤنڈز سپریم کورٹ کے اکاؤنٹ میں آئے، ان پیسوںکو بددیانتی سے ایسے اکاؤنٹ میں بھیجا گیا جس کا پاکستان کے خزانے سے کوئی تعلق نہیں تھا، چیف جسٹس کی جانب سے کہا گیا ہے یہ پیسہ حکومت پاکستان اور عوام کا ہے، حکومت جس طرح چاہے عوامی بہبود کیلئے استعمال کر سکتی ہے۔
