پشاور: مشیر اطلاعات خیبرپختونخوا بیرسٹر سیف نے دہشت گردی روک تھام پر وفاق کے کردار پر غم وغصے کا اظہار کرتے ہوئے کہا ہے کہ دہشت گردی قومی مسئلہ، وفاق ذمہ داری صوبے پر ڈال کر بری الذمہ نہیں ہوسکتا، وفاق کی غیر سنجیدگی ،افغانستان کیساتھ سرد مہری کے باعث دہشت گردی میں اضافہ ہو رہا ہے۔جاری بیان میں بیرسٹر سیف نے کہا کہ دہشت گردی صرف خیبر پختونخوا کا نہیں بلکہ قومی مسئلہ ہے، وفاقی حکومت اس حوالے سے تمام ذمہ داری صوبے پر ڈال کر خود کو بری الذمہ قرار نہیں دے سکتی۔
انہوں نے کہا کہ وفاقی حکومت دہشت گردی معاملے پر غیر سنجیدہ رویہ اپنا رہی ہے،وفاق کی غیر سنجیدگی ،افغانستان کیساتھ سرد مہری کے باعث دہشت گردی میں اضافہ ہو رہا ہے، وفاقی حکومت نہ خود افغانستان سے مذاکرات کر رہی ہے نہ ہمیں کرنے دے رہی ہے۔
انہوںنے کہا کہ خیبر پختونخوا حکومت کے افغانستان سے بات چیت کیلئے وفاق کو بھیجے گئے ٹی او آرز سرد خانے میں ڈال دیئے گئے ہیں۔
انہوں نے کہا کہ وفاقی حکومت فوری ٹی او آرز کی منظوری دے تاکہ افغانستان سے مذاکرات کا سلسلہ شروع ہو سکے۔ انہوں نے کہا کہ خیبر پختونخوا حکومت ملک ،صوبے کے وسیع تر مفاد میں وفد افغانستان بھیج رہی ہے۔ انہوںنے کہا کہ عوام کے جان و مال کا تحفظ خیبر پختونخوا حکومت کی اولین ترجیح اور بنیادی ذمہ داری ہے۔
