لاہور: سینئر وزیر حکومت پنجاب مریم اورنگزیب نے لیگی حکومت کے ایک سال کو بے مثال قرار دیتے ہوئے کہا ہے کہ 12ماہ میں معاشی معجزے رونما ہوئے، ایک سال میں پاکستان نے مایوسی سے اعتماد، ناامیدی سے امید نو، انتشار سے استحکام کا شاندار سفر طے کیا۔
مسلم لیگی حکومت کو ایک سال مکمل ہونے پر سوشل میڈیا سائٹ ایکس پر جاری بیان میں مریم اورنگزیب نے کہا کہ نواز شریف کی رہنمائی میں لیگی حکومت کے 365دن کا ہر روز، ہرلمحہ پاکستان کی ترقی اور عوام کے ریلیف کی خوش خبریاں لے کر طلوع ہوا۔
انہوں نے کہا کہ وزیر اعظم شہباز شریف کی قیادت میں گزرے ایک سال میں پاکستان نے مایوسی سے اعتماد، ناامیدی سے امید نو، انتشار سے استحکام اور ڈیفالٹ سے نجات پاکر معاشی استحکام کی طرف شاندار سفر طے کیا۔
انہوں نے کہا کہ 12ماہ میں معاشی معجزے رونما ہوئے، مہنگائی 38سے کم ہوکر 9 سال کی کم ترین سطح 1.5فی صد پر آ گئی، لیگی حکومت میں ہر نیا دن ملک و قوم کے خوشحال مستقبل کے خواب کو تعبیر کے قریب لاتا ہے۔ انہوں نے کہا کہ نواز شریف کی قیادت میں لیگی حکومت ہی وہ واحد جمہوری قوت ہے جو پاکستان کو ترقی دے سکتی ہے، یہ سچائی ایک بار پھر ثابت ہو چکی ہے۔الحمدللہ ۔
