لاہور: وزیر اطلاعات پنجاب عظمی بخاری نے کہا ہے کہ عالمی ادارے ملکی معیشت بہتر ہونے کا بتا رہے ، مریم نواز کا ایک سال جتنا کام کوئی حکومت 5سال میں نہیں کرسکی، ایک جماعت کے پاس رونے دھونے کے سوا کچھ نہیں، خیبرپختونخوا میں عوامی ریلیف کیلئے ایک منصوبہ نہیں دیا گیا، (ن)لیگ کی حکومت دیگر صوبوں میں بھی ترقی دیکھنا چاہتی ہے۔
لاہور میں پریس کانفرنس کرتے ہوئے عظمی بخاری نے کہاہے کہ پاکستان کے عوام آج یوم تعمیر و ترقی منا رہے ہیں، جبکہ دوسری طرف یوم سیاہ منا یاجارہا ہے، ان کے پاس رونے دھونے کے سوا کچھ نہیں ہے۔انہوں نے کہا کہ پنجاب میں مریم نواز کی حکومت بننے سے عوام کو ریلیف ملا، پنجاب کے بچوں کو سکالر شپس دی گئیں، بجلی بلوں میں ریلیف دیا گیا، خدمت کارڈ جیسی سہولت ملی، پنجاب کی اقلیتوں کیلئے مینارٹی کارڈ متعارف کرایا گیا۔
انہوںنے کہا کہ جب ہم نے حکومت لی تو مہنگائی 38فیصد تھی آج 4فیصد پر ہے، 50لاکھ گھر اور ایک کروڑ نوکریوں جیسے دعوے نہیں کرتے، مریم نواز وہ وعدہ کرتی ہیں جس پر عمل درآمد ہوسکتا ہو۔انہوں نے کہا کہ مریم نواز نے ایک سال میں اتنا کام کیا جتنا کوئی حکومت 5سال میں نہیں کرسکی، نگہبان رمضان پیکیج کے تحت 10ہزار روپے مستحق خاندانوں کو دیئے جائیں گے، پیکیج میں رجسٹریشن کی آخری تاریخ 15فروری ہے، پیکیج کے تحت لوگوں کو ان کے گھروں میں پے آرڈرز پہنچائے جائیں گے۔
انہوں نے کہا کہ مریم نواز کسی ایک پارٹی کیلئے منصوبے نہیں بناتیں، نگہبان رمضان پیکیج کیلئے تمام مستحق افراد اہل ہیں، تمام بینکوں کے ساتھ ہمارے معاملات طے ہیں، کسی بھی بینک سے پے آرڈر کیش کرایا جا سکتا ہے۔
انہوں نے کہا کہ ماڈل رمضان بازار بھی ہر ڈسٹرکٹ سطح پر موجود ہوں گے، رمضان بازاروں میں سبسڈی پر اشیا عوام کو میسر ہوں گی۔ انہوں نے کہا کہ گزشتہ روز قذافی سٹیڈیم میں شاندار تقریب کا انعقاد ہوا، ہمارے بچوں کو ایسے ایونٹس کی ضرورت ہے ،قذافی سٹیڈیم میں میچز کیلئے سکیورٹی کے انتظامات وزیراعلی خود دیکھ رہی ہیں، ماضی میں سٹیڈیمز کو بھی اپنی سیاست کیلئے استعمال کیا گیا، نوجوانوں کیلئے کھیلوں کے میدان آباد ہونے چاہئیں۔
انہوں نے کہا کہ آج تعمیر و ترقی اور خوشی کا دن ہے تو منفی باتیں نہیں ہونی چاہئیں، عالمی ادارے اور تنظیمیں پاکستان کی معیشت کے بہتر ہونے کا بتا رہے ہیں۔ انہوں نے کہا کہ پنجاب کے عوام کیلئے متعدد منصوبے شروع کئے گئے جبکہ دوسری طرف ایسی جماعت ہے جو خود بھی روتی ہے اور عوام کو بھی رونے پر مجبور کرتے ہیں، ان کی ایک صوبے میں حکومت ہے وہاں کے عوام کو کیا ملا؟عوامی ریلیف کیلئے ایک بھی منصوبہ نہیں دیا گیا۔
انہوں نے کہا کہ (ن)لیگ کی حکومت دیگر صوبوں میں بھی ترقی دیکھنا چاہتی ہے۔ ایک سوال پر انہوں نے کہا کہ گورنر پنجاب ہمیشہ ناراض ہی رہتے ہیں، گورنر پنجاب سے متعلق کوئی تبصرہ نہیں کروں گی۔
