لاہور: وزیراعلی پنجاب مریم نواز نے پاکستان کی پہلی مکمل ای وی بس سروس کا افتتاح کرتے ہوئے ہر بس سٹینڈ پرسیف سٹی کیمرے نصب کرنے کی ہدایت کردی جبکہ ای ٹیکسی کی پنجاب میں اسمبلنگ کا جائزہ لینے اور نجی اشتراک سے الیکٹرک چارجنگ سٹیشنز قائم کرنے کیلئے اقدامات اٹھانے کا حکم دے دیا۔
جمعہ کو وزیراعلی پنجاب مریم نواز نے پاکستان کی پہلی مکمل ای وی بس سروس کے افتتاح کے موقع پر الیکٹرک بس میں سواری کی اور تفصیلی معائنہ کیا ۔اس موقع پر وزیر ٹرانسپورٹ بلال اکبر نے ای وی بس بارے وزیراعلی کو تفصیلی بریفنگ دیتے ہوئے بتایا کہ الیکٹرک بس میں جی پی ایس لوکیشن ریکارڈر،وائی فائی، یو پی ایس پورٹ اور دیگر سہولیات موجود ہیں، الیکٹرک بس میں 30نشستیں اور 80مسافروں کی گنجائش ہو گی، الیکٹرک بس میں خصوصی افراد کیلئے ریمپ اور نشستیں مخصوص ہوں گی ۔وزیراعلی پنجاب کو بتایا گیا کہ پہلی بار میں بس مسافروں کے تحفظ کیلئے فرش پر اینٹی سلپ شیٹ کا استعمال کیا گیا ہے ، مکمل الیکٹرک بس کیلئے نو مخصوص چارجنگ سٹیشن قائم کئے گئے ہیں، ایک بار چارجنگ کے بعد بس 250کلومیٹر فاصلہ طے کر سکے گی ، بس میں مسافروں کی سہولت کیلئے روٹ ڈسپلے بھی نظر آئے گا۔وزیراعلی کو بتایا گیا کہ الیکٹرک بس میں خواتین کیلئے الگ فی میل سیکشن ہو گا، ہراسانی واقعات کے سد باب کیلئے کیمرے بھی نصب ہوں گے ۔
وزیراعلی کو بتایا گیا کہ لاہورکے سب سے بڑے طویل ترین 21کلو میٹر روٹ پر 27الیکٹرک بسیں چلائی جائیں گی ، الیکٹرک بس ریلوے سٹیشن تا گرین ٹاؤن براستہ کوئینز روڈ، مزنگ، فیروز پور روڈ،کیمپس پل اور اچھر ہ کینال نہرچلے گی۔لاہور کی پہلی ای بس سروس پر 17 ہزار مسافر روزانہ سفر کر سکیں گے ، ریلوے سٹیشن تا گرین ٹاؤن روٹ ای وی بس سروس کا باقاعدہ آغاز فروری کے وسط میں ہوگا ، ریلوے سٹیشن تا گرین ٹاؤن روٹ پر 42جدید ترین بس شیلٹر زبھی قائم کئے گئے ہیں، بس ہر 9منٹ کے بعد آئے گی۔وزیراعلی کو بتایا گیا کہ الیکٹرک بس کیلئے مخصوص ایپ بھی متعارف کرائی جائیگی جس سے بس کی ٹریکنگ ممکن ہو گی، الیکٹرک بس کا کرایہ ڈیجیٹل والٹ،ڈیجیٹل کارڈ کے ذریعے ادا کیا جا سکے گا ، یورنیورسل ٹرانسپورٹ کارڈ بھی ایشو کئے جائیں گے جبکہ الیکٹرک بس کیلئے 70ڈرائیور زکی سپیشل ٹریننگ کا آغاز بھی کردیا گیا ہے ۔
اس موقع پر وزیراعلی مریم نواز نے بس سٹینڈ پر سولر فین اور واٹر کولر کی تنصیب کا جائزہ لینے کی ہدایت جبکہ ہر بس سٹینڈ پرسیف سٹی کیمرے نصب کرنے کا بھی حکم دیا۔بعدازاں وزیراعلی کی زیر صدارت خصوصی اجلاس بھی ہوا جس میں ای ٹیکسی پراجیکٹ کا جائزہ لیا گیا، مریم نواز نے ای ٹیکسی کی پنجاب میں اسمبلنگ کا جائزہ لینے اور نجی اشتراک سے الیکٹرک چارجنگ سٹیشنز قائم کرنے کیلئے اقدامات اٹھانے کی ہدایت کی ۔
