لاہور: وزیر اطلاعات پنجاب عظمی بخاری نے واضح کیا ہے کہ سیلاب متاثرین کو سہولیات فراہمی پر سمجھوتہ نہیں کیا جائیگا، چھوٹے لوگ سیلاب متاثرین کے نام پر سیاست کر رہے، جھوٹا پروپیگنڈا کرنیوالے انسانی جانوں کی اہمیت، متاثرین کے مسائل سے لاعلم ہیں۔
جاری بیان میں عظمی بخاری نے کہا کہ 3ہفتوں سے ضلعی انتظامیہ، سول ڈیفنس، ریسکیو 1122، پنجاب پولیس اور دیگر ادارے متاثرہ افراد کی مدد میں مصروف ہیں جبکہ پاک فوج اور رینجرز کی ٹیمیں بھی جذبہ حب الوطنی کے تحت خدمات سرانجام دے رہی ہیں۔
انہوں نے کہا کہ پنجاب حکومت سیلاب سے متاثرہ ہر علاقے میں متاثرین تک پہنچ رہی ہے ،نواز اپنے فرائض ایک درد دل رکھنے والی ماں اور بہن کی طرح ادا کر رہی ہیں، تاہم بعض چھوٹے لوگ سیلاب متاثرین کے نام پر سیاست کر رہے ہیں، سوشل میڈیا پر جھوٹا پروپیگنڈا کرنے والے انسانی جانوں کی اہمیت اور متاثرین کے مسائل سے لاعلم ہیں۔
انہوں نے کہا کہ عوام اچھی طرح جانتے ہیں کہ مشکل وقت میں کون ان کے ساتھ کھڑا ہے اور کون ان کے زخموں پر نمک پاشی کر رہا ہے۔انہوں نے بتایا کہ مریم نواز خود متاثرہ علاقوں کا دورہ کرکے سہولیات کا جائزہ لے رہی ہیں، جہاں کسی انتظامی کوتاہی کی نشاندہی ہو فورامتعلقہ افسر کو جوابدہ بناتی ہیں۔ انہوں نے واضح کیا کہ سیلاب متاثرین کو فراہم کی جانے والی سہولیات پر کسی قسم کا سمجھوتا نہیں کیا جائے گا۔
