اسلام آباد: وزیر داخلہ محسن نقوی نے کہا ہے کہ سعودی عرب جا کر بھیک مانگنے والوں کیخلاف کریک ڈائون جاری ہے۔
جاری بیان کے مطابق ہفتے کو وزیر داخلہ محسن نقوی نے ڈپلومیٹک انکلیو میں سعودی سفارتخانے کا دورہ کیا اور سعودی سفیر نواف بن سعید احمد المالکی سے ملاقات کی جس میں پاک سعودی تعلقات مزید مضبوط بنانے پر اتفاق کرتے ہوئے باہمی دلچسپی کے امور پر تبادلہ خیال کیا گیا۔
وزیر داخلہ محسن نقوی نے کہا کہ پاکستان اور سعودی عرب کے تعلقات ہر آزمائش میں پورا اترے ہیں۔ انہوں نے پاک بھارت کشیدگی میں سعودی عرب کے مخلصانہ، برادرانہ اور موثر کردار پر شکریہ ادا کرتے ہوئے کہا کہ جنگ ہو یا امن، سعودی عرب نے ہمیشہ پاکستان کا بھرپور ساتھ دیا ہے۔
انہوں نے بتایا کہ سعودی عرب جا کر بھیک مانگنے والے مافیا کے خلاف سخت کریک ڈائون جاری ہے اور اس سلسلے میں زیرو ٹالرنس پالیسی اختیار کی گئی ہے۔
اس موقع پر سعودی سفیر نے کہا کہ پاکستان ہمارا برادر دوست ملک ہے ، ہم پاکستان کے ساتھ تعلقات کو خصوصی اہمیت دیتے ہیں۔
