اسلام آباد: وفاقی وزیر داخلہ محسن نقوی نے تجاوزات و غیر قانونی مکینوں کیخلاف آپریشن 30ستمبر تک مکمل کرنے کا حکم دیتے ہوئے نئے سیکٹرز کی پلاننگ ،فائیو سٹار ہوٹلز منصوبے پر پیشرفت اور دامن کوہ کی ری ماڈلنگ کی ہدایت کردی۔
ہفتے کو وزیر داخلہ کی زیر صدارت سی ڈی اے ہیڈکوارٹر میں اجلاس کا انعقاد ہوا جس میں دارالحکومت میں عوامی سہولت کیلئے جاری و نئے منصوبوں کا جائزہ لیا گیا۔
اجلاس میں چیئرمین سی ڈی اے محمد علی رندھاوا، ممبران سی ڈی اے، اے ڈی سی جی، ایس ایس پی آپریشنز اور دیگر حکام نے شرکت کی۔اجلاس کو بتایا گیا کہ ماڈل جیل کا پہلا مرحلہ جاری ہے جو جلد مکمل ہو جائے گا، اسی طرح اسلام آباد میں کیپٹل ہائوس کے قیام کیلئے جگہ مختص کر دی گئی ہے، اجلاس میں فیصلہ کیا گیا کہ ٹی چوک فلائی اوور اور شاہین چوک انڈر پاس کا سنگ بنیاد ستمبر کے آغاز میں رکھا جائے گا۔
اجلاس میں گندھارا ہیریٹیج اینڈ سٹیزن سنٹر کو فعال بنانے کے مختلف ماڈلز کا جائزہ لیا گیا جبکہ شہریوں کی سہولت کیلئے دامن کوہ کی ری ماڈلنگ کرنے کی بھی ہدایت دی گئی۔اجلاس میں زیر تعمیر سیکٹرز C-14، C-15 اور C-16 پر کام کی پیش رفت کا جائزہ لیا گیا جبکہ زیر التوا سیکٹرز E-12 اور I-12 کو جلد مکمل کرکے الاٹیز کے حوالے کرنے کی ہدایت کی گئی۔
وزیر داخلہ نے نئے سیکٹرز C-13، D-13، E-13 اور F-13 کی ڈویلپمنٹ کیلئے جامع پلان پیش کرنے کی ہدایت کی۔ وزیر داخلہ نے حکم دیا کہ اسلام آباد میں دو فائیو سٹار ہوٹلوں کی تعمیر کے ابتدائی کام کو 31 دسمبر تک مکمل کیا جائے۔
اجلاس میں ڈپلومیٹک انکلیو اپ گریڈیشن پراجیکٹ کے فیز ون کا آغاز کرنے کی ہدایت دی گئی جس کے تحت شاہراہِ دستور سے مین انٹری، ملحقہ شاہراہ، بانڈری وال، سائیکلنگ ٹریک اور پارک کی تعمیر و مرمت شامل ہوگی۔وزیر داخلہ نے ہائوسنگ سوسائٹیز کو قواعد و ضوابط پر عملدرآمد یقینی بنانے کی ہدایت دیتے ہوئے کہا کہ خلاف ورزی کی صورت میں سخت تادیبی کارروائی ہوگی۔
اجلاس میں وزیر داخلہ نے تجاوزات کے مکمل خاتمے کا حکم دیتے ہوئے واضح کیا کہ اس حوالے سے کسی قسم کی نرمی نہیں برتی جائے گی۔وزیر داخلہ نے 30ستمبر تک غیر قانونی مکینوں کیخلاف آپریشن کرکے متعلقہ سیکٹرز کو کلیئر کرنے کی ہدایت دیتے ہوئے ایس ایس پی آپریشنز، اے ڈی سی جی اور ڈائریکٹر ڈی ایم اے کو ٹاسک سونپ دیا۔
