لاہور: وزیر اعلی پنجاب مریم نواز نے مذہبی رواداری و باہمی احترام کے فروغ کا عزم کرتے ہوئے کہاہے کہ اسلاموفوبیا دنیا بھر میں کڑوی و تلخ حقیقت ہے، ہر اس مظلوم کیساتھ کھڑے ہیں جو مذہبی بنیادوں پر ظلم و زیادتی کا شکار ہو رہے ہیں۔
عقیدے و مذہب کی بنیاد پر تشدد ،نفرت کا نشانہ بننے والے افراد کے عالمی دن پر جاری بیان میں مریم نواز نے کہا کہ ہماری ہمدردی مذہب تعصب کی بنا پر ظلم سہنے والے مظلوموں کیساتھ ہے، اسلاموفوبیا دنیا بھر میں ایک کڑوی اور تلخ حقیقت ہے۔
انہوں نے کہا کہ مساجد پر حملے، حجاب پہننے والی خواتین پر پابندیاں اور مسلمانوں کو دہشت گردی سے جوڑنے کی روش انسانیت کیلئے نشان ہے، فلسطین کی زمین خونِ شہدا سے سرخ ہے، معصوم بچوں کی آہیں گولیوں کی گھن گرج میں دفن ہو رہی ہیں۔
انہوں نے کہا کہ کشمیر کی وادیاں آج بھی صدیوں پرانے دکھوں سے لہو لہان ہیں، کشمیر اور غزہ انسانیت کے ضمیر پر سوال ہیں جن کا جواب عالمی برادری ابھی تک دینے سے قاصر ہے۔
انہوں نے کہا کہ دین اسلام محبت امن اور رواداری کا درس دیتا ہے، ہر سطح پر مذہبی رواداری اور باہمی احترام کا فروغ ہمارا عزم ہے، ہمیشہ ہر اس مظلوم کیساتھ کھڑے ہیں جو مذہبی بنیادوں پر ظلم و زیادتی کا شکار ہو رہے ہیں۔
