کراچی: سینئر اداکارہ فضیلہ قاضی نے پاکستانی ڈراموں پر شدید تنقید کرتے ہوئے کہا ہے کہ حقیقت میں ہر غریب لڑکی کو امیر لڑکا نہیں ملتا، ڈراموں میں غیر حقیقی خواب دکھائے جا رہے ہیں۔
نجی ٹی وی پرو گرام میں گفتگو کرتے ہوئے انہوں نے کہا ڈراموں کے ذریعے معاشرے کے معصوم لوگوں کے ذہنوں کو خراب کیا جا رہا ہے کیونکہ ہمارے معاشرے میں زیادہ تر لوگ درمیانے طبقے سے تعلق رکھتے ہیں۔
انہوں نے کہا ڈراموں میں دکھایا جاتا ہے کہ ایک غریب گھر کی لڑکی آفس جاتی ہے جہاں اس کی ملاقات ایک امیر لڑکے سے ہوتی ہے، دونوں میں محبت ہو جاتی ہے اور پھر شادی ہو جاتی ہے، حالانکہ حقیقت میں ایسا نہیں ہوتا، ڈراموں کے ذریعے اس طبقے کو نہ پورے ہونے والے خواب دکھائے جا رہے ہیں، عام طور پر نا ہونیوالی چیزوں کو ڈراموں میں ایسے پیش کیا جا رہا ہے جیسے وہ حقیقت میں اسی طرح ہوتی ہیں۔
انہوں نے مزید کہا کہ ڈراموں میں غلط تصورات دکھائے جا رہے ہیں، لوگوں کو خواب بیچے جا رہے ہیں تاکہ ڈراموں کی ریٹنگز بہتر ہوں، اس وجہ سے ڈراما انڈسٹری اپنی ذمہ داریوں کو بھی نظر انداز کر رہی ہے اور وہ چیزیں عام کی جا رہی ہیں جو نہیں ہونی چاہئیں، جن کی وجہ سے معاشرے میں مسائل پیدا ہو رہے ہیں۔
فضیلہ قاضی نے کہا کہ عام طور پر انسان اپنے ہی طبقے، محلے اور خاندان میں شادی کرتا ہے، مثال دیتے ہوئے انہوں نے کہا کہ چونکہ وہ خود ایک اداکارہ تھیں اس لیے انہوں نے بھی ایک اداکار سے شادی کی۔
