اسلام آباد: وزیراعظم شہباز شریف نے کہا ہے کہ حکومت تمام شہریوں کے حقوق کے تحفظ اور معیار زندگی بہتر کرنے کیلئے پر عزم ہے ،انسانیت کی خدمت کا پرخلوص جذبہ پاکستان کی سماجی و معاشرتی اقدار و تہذیب کا اثاثہ ہے، من حیث القوم اس پر فخر ہے، آنیوالی نسلوں کو روشن معاشرتی اساس سے وابستہ تربیت دیں گے۔
انسانیت کے عالمی دن پر جاری بیان میں وزیراعظم نے کہا کہ پاکستان اقوام عالم کے شانہ بشانہ آج کے دن انسانیت، انسانی اقدار، اخلاقیات اور تہذیب و تمدن کے علمبرداروں کو خراج تحسین پیش کرتا ہے۔ انہوں نے کہا کہ رواں سال یہ دن جذبہ خیر سگالی اور مقامی کیمونٹی کی افادیت اور مضبوطی کے عنوان سے منایا جارہا ہے۔
انہوں نے کہا کہ پاکستان کیلئے یہ دن انسانیت کی خدمت اور حفاظت کے جذبہ کے لئے عزم نو اور تجدید عہد کا موقع ہے، ہم تہہ دل سے ان تمام رضاکاروں کی عزم وہمت، بہادری اور غیر متزلزل جذبہ کو سلام پیش کرتے ہیں جو مصیبت میں گھیرے لوگوں کو امداد پہنچاتے ہیں۔
انہوں نے کہا کہ رضاکار خدمت گار بلاشبہ حادثات، قدرتی آفات اور دیگر ایمرجنسی حالات میں اپنے نواحی علاقوں میں فوری امداد پہنچانے میں اہم کردار ادا کرتے ہیں۔
وزیراعظم نے کہا کہ ہمارے معاشرے میں بے لوث خدمت، دوسروں کی امداد اور فلاحی کاموں میں شرکت کو قدر کی نگاہ سے دیکھا جاتا ہے۔ انسانیت کی خدمت کا یہ پرخلوص جذبہ، پاکستان کی سماجی و معاشرتی اقدار اور تہذیب کا اثاثہ ہے اور ہم من الحیث القوم اس پر فخر کرتے ہیں اور اس بات کا اعادہ بھی کرتے ہیں کہ ہم اپنی آنے والی نسلوں کو انسانیت پرور اور اپنی روشن معاشرتی اساس سے وابستہ تربیت دیں گے۔
انہوں نے کہا کہ ایک اور قابل فخر رویہ جو ہمارے معاشرے کا خاصہ ہے وہ خواتین، بزرگ اور بچوں کی خصوصی حفاظت اور عزت و تکریم ہے، کسی بھی ناگہانی آفت اور حالات میں ان طبقات کو مدد اور تحفظ کی زیادہ ضرورت ہوتی ہے، ہمارا معاشرہ بحیثیت مجموعی انسانیت کی خدمت کے لئے ہر دم تیار نظر آتا ہے۔
انہوں نے کہا کہ رواں سال موسمی حالات کی شدت نے ملک کے طول و عرض میں غیر معمولی صورتحال کو جنم دیا اور ہم نے وفاقی و صوبائی حکومتوں، حکومتی اداروں کے ساتھ عوام کو بھی امدادی کاروائیوں میں رضاکارانہ طور پر پیش پیش دیکھا،علاوہ ازیں ہماری عوام دیگر ہنگامی صورتحال، جس میں بھوک افلاس، بے روزگاری، جنگی حالات شامل ہیں، اس میں بھی ایک دوسروں کو اپنی استطاعت کے مطابق سہولت و امداد پہنچاتے ہیں۔انہوں نے کہا کہ ہمارا ملک دنیا میں عطیات کرنے والے سر فہرست ممالک میں آتا ہے۔ اسی جذبہ و ایثار کی بدولت کوئی غریب بھوکا نہیں رہتا۔
انہوں نے کہا کہ حکومت تمام شہریوں کے حقوق کے تحفظ اور ان کے معیار زندگی بہتر کرنے کے لئے پر عزم ہے اور ساتھ ساتھ رضا کار خدمت گاروں کی حفاظت اور حوصلہ افزائی بھی حکومت کے ترجیحات میں شامل ہے۔
وزیراعظم نے کہا کہ آیئے اس دن کو بحیثیت قوم اس عزم سے منائیں کہ نہ صرف اپنے مقامی علاقے، شہر، ملک بلکہ حسب توفیق دنیا بھر میں انسانیت کی حفاظت اور انسانی اقدار کے فروغ کے لئے تعمیری اور موثر کردار ادا کریں گے ۔
