کراچی: پاکستانی اداکارہ طوبی انور نے کہا ہے کہ میں لوگوں کو نجی زندگی سے متعلق جوابات دے کر گھر کی باتیں باہر نہیں لانا چاہتیں، اس لیے کبھی کسی کو جواب نہیں دیا، خاموش رہنا ٹھیک سمجھتی ہوں لیکن یہ مطلب نہیں کہ ان سے متعلق کہی جانے والی باتیں درست ہیں۔
ایک پوڈ کاسٹ میں گفتگو کرتے ہوئے انہوںنے کہا میرے تنقید اور الزامات کا جواب نہ دینے کا مطلب یہ نہیں ہے کہ لوگ جو کہہ رہے ہیں وہ صحیح ہے، میری خاموشی کا مطلب یہ ہے کہ میں مذکورہ معاملے پر بات نہیں کرنا چاہتی۔
انہوں نے کہا کہ میں نے کبھی بھی نجی زندگی پر کی جانے والی تنقید یا مجھ پر لگائے گئے الزامات کا جواب نہیں دیا، میں نے ہمیشہ خاموش رہنا پسند کیا۔
طوبی انور نے کیرئیر سمیت ذاتی زندگی سے متعلق بتایا کہ ابتدائی طور پر وہ پروڈکشن اور کارپوریٹ سیکٹر میں کام کرتی تھیں لیکن پھر اداکاری میں آگئیں جبکہ اداکاری میں کوئی خاص دلچسپی بھی نہیں تھی۔ طوبی انور نے کہا کہ بے جا تنقید ذہنی صحت کو متاثر کرتی ہے لیکن اب انہوں نے ایسے تبصروں پر توجہ دینا چھوڑ دی ہے۔
