اسلام آباد (لارڈ میڈیا)، 26 اگست: نوبیل سسٹین ایبلٹی ٹرسٹ نے وزیراعلیٰ پنجاب مریم نواز شریف کو پائیدار ترقی کے فروغ کے لیے اپنی بین الاقوامی سرگرمیوں اور عالمی مکالمے میں شرکت کی دعوت دے دی۔
وزیراعلیٰ پنجاب کے نام 22 اگست 2026 کو لکھے گئے خط میں نوبیل سسٹین ایبلٹی ٹرسٹ کے چیئرمین پیٹر نوبیل نے مریم نواز کو مستقبل میں ٹرسٹ کے زیر اہتمام بین الاقوامی سرگرمیوں اور عالمی پائیداری سمٹ میں شرکت کی دعوت دی۔
خط میں پنجاب حکومت کی جانب سے مریم نواز کی قیادت میں موسمیاتی لچک، ماحولیاتی تحفظ، جنگلی حیات کے تحفظ، جنگلات، ماحولیاتی نظام کی بحالی اور مختلف شعبوں میں فضائی آلودگی کے مؤثر انتظام کے لیے کیے جانے والے اقدامات کو سراہا گیا۔
نوبیل سسٹین ایبلٹی ٹرسٹ کے مطابق یہ اقدامات پائیدار ترقی کے حوالے سے پنجاب حکومت کے مستقبل بین نقطہ نظر کی عکاسی کرتے ہیں اور پاکستان میں ماحولیاتی بہتری اور طویل المدتی موسمیاتی لچک پیدا کرنے میں معاون ثابت ہو رہے ہیں۔
ٹرسٹ نے موسمیاتی حکمرانی میں ٹیکنالوجی کے استعمال کو بھی نمایاں قرار دیا، جس میں ڈیجیٹل مانیٹرنگ سسٹمز، جیو اسپیشل اینالیٹکس، ریموٹ سینسنگ، مصنوعی ذہانت (AI) اور ماحولیاتی ڈیٹا پلیٹ فارمز شامل ہیں۔
خط میں کہا گیا کہ ان ٹیکنالوجیز کے استعمال اور شواہد پر مبنی فیصلہ سازی سے پنجاب کی موسمیاتی خطرات کی پیشگی نشاندہی، قدرتی وسائل کے بہتر انتظام اور مؤثر ماحولیاتی پالیسیوں کی تشکیل کی صلاحیت میں اضافہ ہوا ہے۔
نوبیل سسٹین ایبلٹی ٹرسٹ نے کہا کہ مریم نواز کا موسمیاتی حکمرانی کا طریقہ کار اس امر کی مثال ہے کہ ٹیکنالوجی اور جدت طرازی کس طرح شفافیت، ادارہ جاتی ردعمل اور بدلتے ہوئے ماحولیاتی چیلنجز کے مقابلے میں معاشرتی لچک کو بہتر بنا سکتی ہے۔
ٹرسٹ کے مطابق ماحولیاتی حکمرانی کو پائیدار معاشی اور سماجی ترقی کے ساتھ آگے بڑھانے کے عزم نے بین الاقوامی سطح پر توجہ حاصل کی ہے اور مریم نواز کا تجربہ اور قیادت عالمی برادری کے لیے مفید بصیرت فراہم کر سکتے ہیں۔
خط میں مریم نواز کو ٹرسٹ کے زیر اہتمام مستقبل کی بین الاقوامی سرگرمیوں اور عالمی پائیداری سمٹ میں شرکت کی تجویز پیش کی گئی ہے۔
پیٹر نوبیل نے کہا کہ ٹرسٹ کا مقصد بین الاقوامی تعاون کو فروغ دینا اور حکومتوں، تعلیمی اداروں، صنعت، مالیاتی اداروں اور سول سوسائٹی کے درمیان روابط قائم کرنا ہے تاکہ اقوام متحدہ کے پائیدار ترقی کے اہداف (SDGs) کے حصول کی رفتار تیز کی جا سکے۔
ٹرسٹ نے کہا کہ پیچیدہ ماحولیاتی اور سماجی چیلنجز سے نمٹنے کے لیے عالمی رہنماؤں کے درمیان تعاون ناگزیر ہے اور اس نے پنجاب حکومت کے ساتھ مزید قریبی تعاون کی خواہش کا اظہار کیا۔
خط کے اختتام پر نوبیل سسٹین ایبلٹی ٹرسٹ نے مریم نواز کے ساتھ مل کر بین الاقوامی مکالمے کے فروغ، عالمی شراکت داریوں کو مضبوط بنانے اور زیادہ پائیدار مستقبل کے لیے عملی حل آگے بڑھانے کی امید ظاہر کی۔
