ہرارے (شِنہوا) زمبابوے کے دارالحکومت ہرارے میں پیر کے روز شروع ہونے والی رواں سال کی زرعی نمائش (زیڈ اے ایس) میں شریک چینی کمپنیاں زمبابوے کی منڈی میں اپنی کاروباری سرگرمیوں کو مزید وسعت دینے کی خواہاں ہیں۔
اس سال 6 روزہ نمائش میں 640 سے زائد نمائش کنندگان شریک ہیں، جہاں زراعت، ٹیکنالوجی، تجارت اور صنعت کے شعبوں میں جدید مصنوعات اور جدتوں کو پیش کیا جا رہا ہے۔
زمبابوے میں قائم چین کی ملکیتی کمپنی کیانگا کوارٹز سلیبز کی بزنس منیجر ویلری نوکودزا نے کہا کہ کمپنی زمبابوے کی بڑھتی ہوئی تعمیراتی منڈی میں نمایاں حصہ حاصل کرنے کی امید رکھتی ہے۔
انہوں نے کہا کہ اس نمائش میں کئی تعمیراتی کمپنیاں شریک ہیں جس سے ہمیں ان کے ساتھ رابطہ کرنے اور اپنے کاروبار کو وسعت دینے کا موقع مل رہا ہے۔
ماشونالینڈ ویسٹ صوبے کے شہر نورٹن میں قائم کیانگا کمپنی مختلف نوعیت کے استعمال کے لئے کوارٹز کی سلیب تیار کرنے میں مہارت رکھتی ہے، جن میں باورچی خانے کے کاؤنٹر ٹاپس، غسل خانوں کی میزیں، بار کاؤنٹرز، کھڑکیوں کی چوکھٹیں، دروازوں کے فریم، میزیں اور کچن آئی لینڈز شامل ہیں۔
زمبابوے کی تعمیراتی صنعت میں ترقی کے پیش نظر نوکودزا نے کہا کہ کمپنی ملک میں تیار کی جانے والی معیاری مصنوعات کے ذریعے مقامی منڈی میں اپنا کردار مزید بڑھانا چاہتی ہے۔
انہوں نے کہا کہ ہمیں امید ہے کہ ہفتے کے اختتام تک مزید صارفین ہماری جانب متوجہ ہوں گے کیونکہ زمبابوے کی تعمیراتی صنعت میں حالیہ برسوں کے دوران نمایاں ترقی ہوئی ہے۔
چینی ہائی ٹیک کمپنی گوانگ ژو سان جنگ الیکٹرک کی سیلز نمائندہ پی جیا وین نے کہا کہ کمپنی زمبابوے کی منڈی میں اپنی مصنوعات کی رسائی بڑھانے کی کوشش کر رہی ہے۔ یہ کمپنی شمسی توانائی کے انورٹرز، توانائی ذخیرہ کرنے والے انورٹرز اور دیگر متعلقہ نظام تیار کرتی ہے۔
انہوں نے کہا کہ گھریلو اور صنعتی صارفین کے لئے کمپنی کی مصنوعات شمسی بجلی پیدا کرنے، بجلی ذخیرہ کرنے اور توانائی کے بہتر استعمال میں مدد دیتی ہیں۔
انہوں نے مزید کہا کہ کمپنی کے تجارتی اور صنعتی حل، جن میں شمسی توانائی سے چلنے والے پمپ کنٹرولرز بھی شامل ہیں، آبپاشی کے نظام کو بجلی فراہم کر سکتے ہیں اور زمبابوے میں زرعی پیداوار بڑھانے میں مدد دے سکتے ہیں۔
اس سال کی نمائش کا انعقاد زمبابوے ایگریکلچرل سوسائٹی نے کیا ہے، نمائش کا موضوع ” ترقی کو تقویت دینا: جہاں زراعت، ٹیکنالوجی اور تجارت یکجا ہوتی ہیں” ہے۔ نمائش میں زراعت اور اس سے منسلک صنعتوں کے فروغ پر توجہ مرکوز کی گئی ہے۔
