لاہور: وزیراعلی پنجاب مریم نواز نے قوم کو یوم آزادی کی مبارکباد دیتے ہوئے کہا ہے کہ پاکستان اقوام عالم میں باوقار مقام حاصل کرچکا، معاشی ترقی کی راہ پر گامزن ہے، ملک کو عظیم سے عظیم تر بنانے کا عہد کرنا ہوگا۔
78ویں یومِ آزادی پر قوم کو مبارکبا دیتے ہوئے مریم نواز نے کہا کہ پاکستان جیسی بے مثال نعمت پر ہم اللہ تعالی کے شکر گزار ہیں، آزادی کی نعمت، باوقار زندگی کا موقع اور اسلامی دنیا کی پہلی ایٹمی طاقت ہونے پر ہمیں فخر بھی ہے اور شکر بھی۔
انہوں نے کہا کہ پاکستان ایک روشن چراغ ہے جس کی روشنی سے دنیا جگمگا رہی ہے، پاکستان ہماری آن، بان اور شان ہے، اس کے بغیر ہم کچھ بھی نہیں، ہم یہ دن مناتے ہوئے اپنے ان لاکھوں شہدا کو نہیں بھول سکتے جن کی قربانیوں کی بدولت آج ہم آزاد فضا میں سانس لے رہے ہیں۔ انہوں نے کہا کہ آج کا دن صرف جشن نہیں بلکہ پاک سرزمین سے وفاداری کے عہد کی تجدید کا دن ہے، ہمیں بحیثیت قوم اپنا احتساب کرنا ہوگا کہ پاکستان نے ہمیں عزت، شناخت اور آزادی دی، لیکن ہم نے بدلے میں ملک کو کیا دیا؟۔
انہوں نے کہا کہ اللہ کے فضل و کرم سے پاکستان آج اقوامِ عالم میں باوقار مقام حاصل کر چکا ہے اور معاشی ترقی کی راہ پر گامزن ہے۔ انہوں نے والدین سے اپیل کی کہ وہ اپنے بچوں کو تحریک آزادی اور تحفظ وطن کی داستانیں ضرور سنائیں تاکہ نئی نسل میں حب الوطنی کا جذبہ پروان چڑھے۔
انہوں نے کہا کہ آج کے دن ہم یہ عہد کرتے ہیں کہ وطن عزیز کو عظیم سے عظیم تر بنائیں گے۔
