بیجنگ (شِنہوا) چینی حکام نے منگل کے روز قدرتی آفات سے متعلق مرکزی امدادی فنڈز سے مزید 6 کروڑ یوآن (88 لاکھ 40 ہزار امریکی ڈالر) مختص کئے ہیں تاکہ چین کے وسطی صوبے ہینان میں سیلاب سے بچاؤ، ہنگامی امداد اور آفات سے بحالی کے کاموں میں معاونت کی جا سکے۔
ہینان صوبہ حال ہی میں سمندری طوفان ڈولفن کے باقی ماندہ اثرات کے باعث مسلسل شدید بارشوں کی زد میں رہا، جس کے نتیجے میں مختلف مقامات پر آفات رونما ہوئیں۔
وزارت خزانہ اور وزارت ہنگامی انتظام کی جانب سے مشترکہ طور پر مختص ہونےوالے یہ فنڈز متاثرہ افراد کی منتقلی اور عارضی رہائش، خطرات کے خاتمے اور ان میں کمی، عارضی رہائشی امداد اور متاثرہ مکانات کی مرمت کے لئے استعمال کئے جائیں گے۔ اس اقدام کا مقصد آفات سے ہونے والے نقصانات کو کم کرنا اور متاثرہ افراد کی بنیادی ضروریات زندگی کو یقینی بنانا ہے۔
اس ماہ کے آغاز میں سمندری طوفان ڈولفن کے چین سے ٹکرانے کے بعد اس کے باقی ماندہ اثرات کے باعث کئی صوبوں میں موسلا دھار بارشیں ہوئیں۔ چینی حکام اس سے قبل وسطی صوبوں ہینان اور ہوبے جبکہ مشرقی صوبے آنہوئی میں سیلاب اور ارضیاتی آفات سے نمٹنے کے لئے 8 کروڑ یوآن مختص کر چکے ہیں، جس میں ہینان کے لئے 4 کروڑ یوآن شامل تھے۔
