واشنگٹن (لارڈ میڈیا) امریکی کمیشن برائے بین الاقوامی مذہبی آزادی (یو ایس سی آئی آر ایف) نے بھارت میں مذہبی آزادی کی صورتحال پر گہری تشویش کا اظہار کیا ہے۔ کمیشن نے آر ایس ایس کے سربراہ موہن بھاگوت کے امریکا کے دورے پر تحفظات ظاہر کیے ہیں۔
کمیشن کے مطابق، آر ایس ایس سے منسلک گروہوں نے مذہبی اقلیتوں جیسے مسیحی، دلت، مسلمان اور سکھ برادریوں کے خلاف پرتشدد حملے کیے ہیں۔ کمیشن نے بھارتی حکومت پر الزام لگایا ہے کہ وہ بی جے پی حکومت کے تحت ہندوتوا نظریے پر مبنی پالیسیوں کے ذریعے مذہبی اقلیتوں کے ساتھ امتیازی سلوک کر رہی ہے۔
یو ایس سی آئی آر ایف نے کہا ہے کہ بھارتی حکومت نے بین الاقوامی سطح پر بھی مذہبی اقلیتوں کو نشانہ بنایا ہے، جس میں شمالی امریکا میں سکھ برادری کے افراد کے قتل اور قتل کی کوششیں شامل ہیں۔
کمیشن کے چیئرمین آصف محمود نے کہا ہے کہ بھارت میں مذہبی آزادی کی صورتحال مسلسل خراب ہو رہی ہے اور امریکی حکومت کو آر ایس ایس کے ارکان اور بھارتی حکام کے خلاف ہدفی پابندیوں پر غور کرنا چاہیے۔
کمیشن نے کہا ہے کہ بھارتی حکام مسلمانوں اور مسیحیوں کے خلاف پرتشدد حملوں کو روکنے میں ناکام رہے ہیں اور آر ایس ایس ارکان کو ویزا منسوخ کرنے کی سفارش کی ہے۔
یو ایس سی آئی آر ایف نے بھارت میں سول سوسائٹی کے لیے کم ہوتی گنجائش کی نشاندہی کرتے ہوئے کہا ہے کہ فارن کنٹریبیوشنز ریگولیشن ایکٹ میں ترامیم مذہبی تنظیموں کی سرگرمیوں کو متاثر کر سکتی ہیں۔
