اٹلی (لارڈ میڈیا) یائل ٹریپی، جو اٹلی کے معروف فٹبال کلب کیاگلیاری کے 20 سالہ فرانسیسی فارورڈ ہیں، سوئمنگ پول میں حادثے کے بعد انتہائی نگہداشت کے یونٹ میں داخل ہیں۔ کلب نے تصدیق کی ہے کہ وہ سساری کے اسپتال میں زیر علاج ہیں اور ان کی حالت پر طبی عملہ مسلسل نظر رکھے ہوئے ہے۔
اطالوی میڈیا کے مطابق، ٹریپی اتوار کو شمالی سارڈینیا کے علاقے پورٹو چیروو میں سوئمنگ پول میں موجود تھے جہاں انہوں نے بڑی مقدار میں پانی نگل لیا، جس کے بعد انہیں فوری طور پر ریسکیو کیا گیا۔ رپورٹس میں بتایا گیا ہے کہ ڈاکٹروں نے انہیں طبی طور پر کومہ میں رکھا ہوا ہے۔
کلب نے کھلاڑی کے حادثے کی تفصیلات ظاہر نہیں کی ہیں اور ان کے اہل خانہ کی رازداری کا احترام کرنے کی درخواست کی ہے۔ ٹریپی نے گزشتہ سیزن میں کیاگلیاری کی طرف سے سیری اے کے آٹھ میچز کھیلے اور ایک گول کیا تھا۔ وہ 2022 میں کریتئیل سے کلب کی اکیڈمی میں شامل ہوئے تھے۔
