بیجنگ (شِنہوا) چین نے منگل کے روز کاؤنٹیوں اور چھوٹے شہروں میں خریداری کی صلاحیت بڑھانے کے لئے نئے اقدامات کا اعلان کیا ہے تاکہ نچلی سطح کی بڑی مارکیٹوں کو ملکی طلب اور اقتصادی ترقی کا نیا ذریعہ بنایا جا سکے۔
وزارت تجارت اور دیگر متعلقہ حکام کی جانب سے مشترکہ طور پر جاری کردہ ایک رہنما اصول کے مطابق حکومت نے کاؤنٹیوں میں خریداری کی سہولیات کو بہتر بنانے پر زور دیا ہے۔ ان اقدامات میں قصبوں کے تجارتی مراکز، دیہی منڈیوں اور مقامی میلوں کی تزئین و آرائش شامل ہے۔ اس کے علاوہ ملکی اور بین الاقوامی برانڈز کی حوصلہ افزائی کی گئی ہے کہ وہ مختلف علاقوں میں اپنے سٹورز قائم کریں جبکہ خدمات کو بہتر بنانے کے لئے موجودہ زمینی وسائل کی ترقی کو بھی فروغ دیا جائے گا۔
رہنما دستاویز میں بزرگوں اور بچوں کی ضروریات کے مطابق بہتر خدمات فراہم کرنے، شہری اور دیہی علاقوں کے درمیان اشیاء کی ترسیل کے نظام کو زیادہ موثر بنانے، ضلعی سطح پر روزگار کے مواقع بڑھانے اور رہائشیوں کی آمدن میں اضافے کے لئے مزید ذرائع پیدا کرنے پر بھی زور دیا گیا ہے۔
یہ اقدامات ایک ایسے وقت میں سامنے آئے ہیں جب چین اقتصادی ترقی کو آگے بڑھانے میں کھپت کے کردار کو مزید مضبوط بنانے کی کوشش کر رہا ہے۔
نچلی سطح کی منڈیوں سے عموماً تیسرے درجے اور اس سے چھوٹے شہر، اضلاع، قصبے اور دیہی علاقے مراد ہیں۔ ان علاقوں میں چین کی تقریباً 70 فیصد آبادی رہتی ہے اور صارفین کی اشیاء کی مجموعی پرچون فروخت میں ان کا حصہ تقریباً 60 فیصد ہے۔ یہ منڈیاں شہری اور دیہی معیشتوں کے درمیان ایک اہم رابطے اور ملکی اقتصادی گردش کے اہم حصے کے طور پر ابھر کر سامنے آئی ہیں۔
قومی ترقی و اصلاحاتی کمیشن (این ڈی آر سی) کے ماتحت ایک تحقیقی ادارے سے وابستہ محقق شین بنگ نے کہا کہ نچلی سطح کی مارکیٹوں میں مختلف طبقوں اور علاقوں کی ضروریات متنوع ہیں۔ انہوں نے کہا کہ یہ تنوع کاروباری اداروں کو نئے سروس ماڈلز متعارف کرانے کے وسیع مواقع فراہم کرتا ہے جبکہ لوگوں کی خریداری بڑھانے میں مدد دے گا۔
سرکاری اعداد و شمار کے مطابق 2026 کے پہلے سات ماہ کے دوران دیہی علاقوں میں صارفین کی اشیاء کی پرچون فروخت میں گزشتہ سال کے مقابلے میں 2.4 فیصد اضافہ ہوا جو شہری علاقوں کے مقابلے میں 1.3 فیصد پوائنٹس زیادہ ہے۔ اندازہ لگایا گیا ہے کہ اضلاع اور قصبوں کی سطح پر ہونے والی پرچون فروخت ملک کی مجموعی پرچون فروخت کا تقریباً 40 فیصد ہے۔
این ڈی آر سی کے محقق چھن شی نے کہا کہ چین کے 2 ہزار 800 سے زائد کاؤنٹی سطح کے انتظامی علاقے ایک وسیع اور متنوع ملکی منڈی تشکیل دیتے ہیں۔ انہوں نے کہا کہ کھپت میں بہتری اور جدت کا رجحان بتدریج بڑے شہروں سے کاؤنٹی سطح کی مارکیٹوں تک پھیل رہا ہے جو کھپت پر مبنی ترقی کے لئے ایک اندرونی اور پائیدار محرک فراہم کر رہا ہے۔
