بیجنگ (شِنہوا) چین نے حفاظتی اور ہنگامی آلات کی صنعت کی ترقی کو فروغ دینے کے لئے پانچ سالہ منصوبہ جاری کیا ہے، جس میں ملک کی ہنگامی ردعمل کی صلاحیتوں کو بہتر بنانے میں سرکردہ کمپنیوں کے کردار پر زور دیا گیا ہے۔
وزارت صنعت و انفارمیشن ٹیکنالوجی اور وزارت ہنگامی انتظام کی جانب سے مشترکہ طور پر جاری کئے گئے منصوبے کا مقصد 2030 تک اس صنعت کے حجم، تکنیکی صلاحیتوں، مصنوعات کے معیار اور اطلاق کی سطح میں نمایاں اضافہ کرنا ہے، جبکہ اہم شعبوں کی پیداوار 14 کھرب یوآن (تقریباً 206.22 ارب امریکی ڈالر) تک پہنچانے کا ہدف مقرر کیا گیا ہے۔
منصوبے میں 2030 تک اہم ٹیکنالوجیز میں پیش رفت، مزید استعمال کے مواقع پیدا کرنے اور عالمی سطح پر مسابقت کی حامل سرکردہ کمپنیوں کو فروغ دینے پر بھی زور دیا گیا ہے۔
چین کی حفاظتی اور ہنگامی آلات کی صنعت نے حالیہ برسوں میں تیزی سے ترقی کی ہے اور 2025 میں اہم شعبوں کی پیداوار 10 کھرب یوآن سے تجاوز کر گئی تھی۔
نئی ٹیکنالوجیز اور آلات کو امدادی اور بچاؤ کی کارروائیوں میں صف اول پر زیادہ سے زیادہ استعمال کیا جا رہا ہے۔ رواں سال سیلاب کے موسم کے دوران ڈیموں میں خطرات کا پتہ لگانے اور ہنگامی حالات میں مواصلاتی رابطے یقینی بنانے کے لئے ڈرونز اور سیٹلائٹ مواصلاتی نظام استعمال کئے گئے، جس سے سیلاب پر قابو پانے اور آفات سے نمٹنے کی کارروائیاں زیادہ درست اور موثر ہوئیں۔
جنوری میں ہنگامی انتظام کے آلات میں جدت کو فروغ دینے سے متعلق ایک رہنما اصول میں 2027 کے اختتام تک 20 سے زائد اہم ٹیکنالوجیز میں پیش رفت، 20 سے زائد اقسام کے جدید آلات تیار کرنے اور 30 سے زائد اقسام کے جدید آلات کے وسیع تر استعمال کے اہداف مقرر کئے گئے تھے۔
