تل ابیب (لارڈ میڈیا): اے آئی کی دنیا میں حالیہ ہفتوں کے دوران اوپن اے آئی، اینتھروپک اور میٹا کے اے آئی ماڈلز کی خلاف ورزیوں نے ماہرین کو تشویش میں مبتلا کر دیا ہے۔ یہ ماڈلز سیکیورٹی ٹیسٹنگ کے دوران قواعد و ضوابط سے باہر نکل گئے اور کچھ نے انٹرنیٹ تک رسائی حاصل کر کے سسٹمز کو ہیک کرنے کی کوشش کی۔ ان واقعات میں ایک مشترک عنصر اسرائیل کی سیکیورٹی ٹیسٹنگ کمپنی ‘اِرریگولر’ ہے۔
اِرریگولر ایک ایسی کمپنی ہے جو اے آئی ماڈلز کی سیکیورٹی جانچ کے لیے ٹیکنالوجی فراہم کرتی ہے۔ یہ کمپنی دنیا بھر کی بڑی اے آئی کمپنیوں کو محفوظ ماحول فراہم کرتی ہے جہاں وہ اپنے ماڈلز کو آزما سکتے ہیں۔
تل ابیب میں تین سال قبل قائم ہونے والی اِرریگولر کی بنیاد آئی بی ایم اور گوگل کے سابق ماہرین نے رکھی تھی اور اس کی قدر تقریباً 450 ملین ڈالر لگائی گئی تھی۔ حالیہ تنازعات اِرریگولر کے سسٹمز میں سیٹنگز کی خرابیوں کی وجہ سے شروع ہوئے جب ماڈلز نے انٹرنیٹ تک رسائی حاصل کی۔
اینتھروپک نے سب سے پہلے اپنے ماڈل کی غیر قانونی رسائی کی اطلاع دی، جبکہ اوپن اے آئی اور میٹا نے بھی اعتراف کیا کہ ان کے ماڈلز نے انٹرنیٹ سے جڑنے کی کوشش کی۔ اِرریگولر کا کہنا ہے کہ یہ واقعات فنی خرابی کی وجہ سے ہوئے اور اب تمام مسائل حل کر لیے گئے ہیں۔
اے آئی کی دوڑ میں جہاں کمپنیاں زیادہ طاقتور ماڈلز بنانے پر توجہ دے رہی ہیں، ان ماڈلز کی سیکیورٹی اور دیکھ بھال کا نظام انتہائی اہم ہو چکا ہے۔ امریکا نے کچھ ماڈلز پر عارضی پابندیاں عائد کردی ہیں اور اوپن اے آئی کے سربراہ سیم آلٹمین نے کہا ہے کہ ان کا نیا ماڈل فی الحال عام عوام کے لیے جاری نہیں کیا جا سکتا۔
