ہانگ کانگ (شِنہوا) ہانگ کانگ خصوصی انتظامی خطے کی حکومت کے سیکرٹری مالیات پال چھن نے اپنے ایک بلاگ میں لکھا ہے کہ رواں سال کی دوسری ششماہی میں منعقد ہونے والی 100 سے زائد بڑی تقریبات کے باعث 18 لاکھ 50 ہزار سے زائد سیاحوں کی ہانگ کانگ آمد متوقع ہے۔
چھن نے کہا کہ ہانگ کانگ سائیکلوتھون، ہانگ کانگ وائن اینڈ ڈائن فیسٹیول اور دیگر تقریبات سے دوسری ششماہی میں مجموعی طور پر 5.9 ارب ہانگ کانگ ڈالر (تقریباً 75 کروڑ 20 لاکھ امریکی ڈالر) کی خرید و فروخت کا امکان ہے۔
چھن کے مطابق بڑی تقریبات اور فن و ثقافت کی رونقوں نے صارفین کے اخراجات کو فروغ دیا جس سے سال کی پہلی ششماہی میں ہانگ کانگ کی کل پرچون فروخت میں 9.6 فیصد اضافہ ہوا ہے۔
چھن نے اشارہ دیا کہ چند روز قبل ’کائی تاک سپورٹس پارک‘ میں یورپ کے بعض سرفہرست کلبوں کے درمیان کھیلے گئے فٹ بال کے تین میچوں سے 18 کروڑ ہانگ کانگ ڈالر سے زیادہ آمدن ہوئی اور قریب واقع ریستورانوں کے کاروبار کو بھی فروغ ملا۔
ہانگ کانگ پیلس عجائب گھر اور ایم پلس عجائب گھر کی آمدن میں بھی نمایاں اضافہ دیکھا گیا ہے۔ گزشتہ نومبر سے اگست تک قدیم مصری تہذیب پر مبنی ایک نمائش نے ہانگ کانگ پیلس عجائب گھر کے لئے اشیاء کی فروخت کی مد میں 3 کروڑ ہانگ کانگ ڈالر سے زائد کی آمدن پیدا کی۔
سیکرٹری مالیات نے کہا کہ جب ہانگ کانگ اس سال اکتوبر میں 2026 کی ایشیا بحرالکاہل اقتصادی تعاون کے وزرائے خزانہ کے اجلاس کی میزبانی کرے گا تو دنیا ایک بین الاقوامی مالیاتی مرکز اور شاندار بڑی تقریب کے بہترین میزبان کے طور پر اس کی کشش کا زیادہ گہرائی سے اعتراف کرے گی۔
