صنعا (لارڈ میڈیا) یمن کے حوثی گروپ نے اتوار کو دعویٰ کیا ہے کہ انہوں نے مغربی یمن کے صوبہ تعز میں واقع اہم بحیرہ احمر کی بندرگاہ موچہ میں سعودی حمایت یافتہ فورسز پر بڑے پیمانے پر حملہ کیا ہے۔
حوثی فوجی ترجمان یحییٰ سریع نے سوشل میڈیا پر جاری بیان میں کہا کہ اس کارروائی میں موچہ علاقے میں فوجی اجتماع اور اسلحہ کے ذخائر کو "کثیر تعداد میں بیلسٹک میزائلوں اور ڈرونز” کے ذریعے نشانہ بنایا گیا۔
اعلان سے کچھ دیر قبل، ایک مقامی حکومتی اہلکار نے بتایا کہ حوثیوں نے بندرگاہ پر کئی میزائل داغے، جن کا ہدف "شہری علاقے” تھے۔
موچہ کے رہائشیوں نے بتایا کہ بندرگاہ کی سمت سے کئی دھماکوں کی آوازیں سنائی دیں اور حملوں کے بعد علاقے میں دھواں اٹھتا دیکھا گیا۔
موچہ، جو مغربی یمن کے تعز صوبے میں واقع ہے، بحیرہ احمر کے ساحل کے ساتھ باب المندب کے قریب واقع ہے، جو ایک اہم آبی گزرگاہ ہے اور عالمی بحری راستوں کے لیے اہمیت رکھتا ہے۔
یہ بندرگاہ اور اس کے ارد گرد کے ساحلی علاقے یمن کی بین الاقوامی طور پر تسلیم شدہ حکومت کی حمایت یافتہ فورسز کے کنٹرول میں ہیں۔
یہ حملہ حالیہ دنوں میں یمن میں کشیدگی کے شدید اضافے کے دوران ہوا ہے، جس میں حوثیوں نے مشرقی صوبوں مارب اور حضرموت میں حکومتی فورسز پر میزائل اور ڈرون حملے کیے ہیں۔
