بیجنگ (شِنہوا) چین کے نیشنل آف شور آئل کارپوریشن (سی این او او سی) نے جمعرات کے روز اعلان کیا ہے کہ چین کا اپنا تیار کردہ پہلا 16 میگاواٹ ٹی ایل پی معاون فلوٹنگ ونڈ پاور پلیٹ فارم "ہائی یو آن لان” لو فینگ آئل فیلڈ کے پاور گرڈ سے منسلک ہو گیا ہے جو براہ راست ماحول دوست توانائی فراہم کر رہا ہے۔
کمپنی کے مطابق یہ پلیٹ فارم تقریباً 220 کلومیٹر فی گھنٹہ کی رفتار سے چلنے والی مسلسل ہواؤں کے شدید ترین طوفان کا مقابلہ کرنے کے لئے ڈیزائن اور تیار کیا گیا ہے۔ اس کی فعالیت چین کی کھلے سمندر میں تیرتے ونڈ پاور آلات کی ٹیکنالوجی کے لئے ایک بڑا قدم ہے جس نے ملک کے ساحلی ونڈ پاور کی ترقی کے لئے ایک نیا راستہ کھول دیا ہے۔
بحیرہ جنوبی چین کے شمالی حصے میں ’پرل ریور ماؤتھ بیسن‘ میں ساحل سے تقریباً 136 کلومیٹر دور نصب یہ ونڈ پاور پلیٹ فارم تقریباً 110 منزلہ عمارت جتنا اونچا اور اس کا وزن 7 ہزار 800 ٹن ہے جبکہ اس کے پنکھوں کا گھومنے والا دائرہ فٹ بال کے 7.5 میدانوں کے برابر ہے۔ سی این او او سی کے مطابق یہ بجلی زیر سمندر تار کے ذریعے لو فینگ آئل فیلڈ پاور گرڈ میں منتقل کی جاتی ہے اور امید ہے کہ یہ تنصیب سالانہ 5 کروڑ 40 لاکھ کلوواٹ آور ماحول دوست بجلی پیدا کرے گی۔
کمپنی کے مطابق نیم زیر آب ساحلی ونڈ پاور پلیٹ فارمز کے مقابلے میں ٹینشن-لیگ پلیٹ فارم سسٹم اپنے تیرتے ہوئے ڈھانچے کی بدولت ساخت کی مضبوطی کو متاثر کئے بغیر فولاد کی کھپت کم کرتا ہے۔ یہ تنصیب سمندر میں گھیرے گئے رقبے میں بھی کمی لاتی ہے۔
چین کے گہرے سمندری علاقوں میں ہوا سے توانائی کے وسائل وافر مقدار میں موجود ہیں اور یہ مستقبل میں سمندر سے حاصل ہونے والی ہوا سے بجلی پیدا کرنے کی صلاحیت میں اضافے کے لئے انتہائی اہم ہیں۔ کمپنی کے مطابق توقع ہے کہ یہ منصوبہ سالانہ 15 ہزار مکعب میٹر ایندھن کے تیل کی بچت کرے گا اور کاربن ڈائی آکسائیڈ کے اخراج میں 35 ہزار ٹن کی کمی لائے گا۔
