بخارست (لارڈ میڈیا): رومانیہ کی وزارت خارجہ نے روسی سفارتکار کو نان گراٹا قرار دیتے ہوئے پانچ دنوں میں ملک چھوڑنے کا حکم دے دیا ہے۔ یہ اقدام رومانیہ کی فضائی حدود کی بار بار خلاف ورزیوں کے جواب میں اٹھایا گیا ہے۔
رومانیہ نے ماسکو سے اپنے سفیر کو بھی واپس بلا لیا ہے۔ وزارت خارجہ کے بیان کے مطابق 24 اور 26 جولائی کے درمیان رومانیہ کی فضائی حدود کی خلاف ورزیوں پر یہ فیصلہ کیا گیا۔
روسی سفیر کو میٹنگ کے دوران رومانیہ کے احتجاج کے بارے میں مطلع کیا گیا اور انہیں ڈرونز کے وہ حصے دکھائے گئے جو روسی نژاد تھے۔
وزارت خارجہ نے واضح کیا کہ رومانیہ کی فضائی حدود کی خلاف ورزی ناقابل قبول ہے اور روس کو ان واقعات کے لیے مکمل طور پر ذمہ دار ٹھہرایا گیا ہے۔ رومانیہ نے اپنے سفیر کو مشاورت کے لیے واپس بلانے کا بھی اعلان کیا ہے۔
رومانیہ کے حکام نے تین ڈرونز کو مار گرانے کا اعلان کیا تھا جو بغیر اجازت کے رومانیہ کی حدود میں داخل ہوئے تھے۔
