کیف (لارڈ میڈیا): یوکرین کے صدر وولودیمیر زیلنسکی نے دعویٰ کیا ہے کہ روس ایران کو خلیجی خطے میں امریکی فوجی اڈوں کی سیٹلائٹ معلومات فراہم کر رہا ہے۔ زیلنسکی کے مطابق ان معلومات کا استعمال ایران امریکی اہداف پر حملوں کی منصوبہ بندی کے لیے کر رہا ہے۔
زیلنسکی نے سوشل میڈیا پلیٹ فارم ایکس پر بیان دیا کہ جولائی کے آغاز سے یوکرینی حکام نے خلیجی ممالک میں روسی سیٹلائٹس کی سرگرمیوں میں اضافہ دیکھا ہے۔ ان کے بقول یہ تصاویر ایران تک پہنچتی ہیں اور ان کے مطابق ایرانی حملوں سے منسلک ہیں۔
یہ بیان یوکرین کے بحیرۂ کیسپین میں ایران اور روس کے درمیان عسکری سامان لے جانے والے بحری جہازوں پر حملوں کے دعوے کے بعد سامنے آیا ہے۔ یوکرینی انٹیلی جنس سروس نے بھی ایران اور روس کے درمیان سامان منتقل کرنے والے جہازوں پر ڈرون حملوں کا دعویٰ کیا ہے۔
ایران نے یوکرین کے اس حملے پر احتجاج کرتے ہوئے یوکرینی ناظم الامور کو طلب کیا۔ ایرانی وزیر خارجہ عباس عراقچی نے کہا کہ یہ حملہ اقوام متحدہ کے چارٹر کی خلاف ورزی ہے اور جواب دیا جائے گا۔
امریکی میڈیا میں دعوے کیے جا رہے ہیں کہ روس ایران کو امریکی فوجی تنصیبات کی انٹیلی جنس معلومات دے رہا ہے۔ امریکی وزیر دفاع نے کانگریس میں روس اور چین کی ایران کی مدد کا اشارہ دیا جبکہ صدر ٹرمپ نے انکار کیا۔
زیلنسکی نے مزید کہا کہ 19 اور 20 جولائی کے دوران روسی سیٹلائٹس نے بحرین، اردن اور کویت میں امریکی فضائی اڈوں کی نگرانی کی جس کے بعد ان علاقوں میں ایرانی حملے دیکھنے میں آئے۔ روس اور ایران کی جانب سے ان الزامات پر تاحال کوئی باضابطہ ردعمل سامنے نہیں آیا ہے۔
