کویت (لارڈ میڈیا): بحرین اور کویت نے ایران کے اندر پہلی بار براہ راست فضائی کارروائیاں کی ہیں، جن میں ایرانی فوجی تنصیبات کو نشانہ بنایا گیا۔ امریکی اخبار وال اسٹریٹ جرنل نے رپورٹ کیا ہے کہ دونوں ممالک نے خاموشی سے اپنے جنگی طیارے ایران میں حملوں کے لیے بھیجے۔
رپورٹ کے مطابق بحرینی اور کویتی لڑاکا طیاروں نے ایران میں ڈرونز اور میزائل ذخیرہ کرنے والی تنصیبات کے علاوہ دیگر فوجی مقامات کو نشانہ بنایا ہے۔ یہ دونوں ممالک کی جانب سے تہران کے خلاف پہلی معلوم براہ راست فوجی کارروائی قرار دی جا رہی ہے۔
وال اسٹریٹ جرنل کے مطابق متحدہ عرب امارات نے بھی ان کارروائیوں میں کردار ادا کیا اور ممکنہ اہداف سے متعلق معلومات فراہم کیں۔ امارات نے فضائی دفاعی معاونت بھی فراہم کی، جس سے ظاہر ہوتا ہے کہ خطے کے عرب ممالک ایران کے خلاف دفاعی تعاون بڑھا رہے ہیں۔
یہ کارروائیاں ایسے وقت میں سامنے آئی ہیں جب ایران نے بحرین اور کویت کو اپنے جوابی حملوں کا مرکز بنایا ہوا ہے۔ دونوں ممالک میں امریکی فوجی اڈے موجود ہیں، جس کے باعث وہ خطے میں جاری کشیدگی کا اہم حصہ بن گئے ہیں۔
رپورٹ کے مطابق بحرین اور کویت کی فضائی طاقت محدود ہے، لیکن وہ ایران کے مسلسل حملوں کا جواب دیے بغیر نہیں رہے۔ خطے میں کشیدگی اس وقت مزید بڑھ گئی جب امریکی صدر ڈونلڈ ٹرمپ نے اعلان کیا کہ اسلام آباد مفاہمتی یادداشت کے تحت ہونے والی جنگ بندی اب مؤثر نہیں رہی۔
امریکا اور ایران کے درمیان حملوں کا سلسلہ شروع ہو گیا ہے۔ واشنگٹن نے ایران کے اندر مختلف اہداف کو نشانہ بنانے کا دعویٰ کیا، جبکہ تہران نے خطے کے کئی ممالک میں موجود امریکی فوجی تنصیبات کو نشانہ بنایا۔ بحرین، کویت، متحدہ عرب امارات اور دیگر خلیجی ممالک کی شمولیت نے مشرق وسطیٰ میں جاری تنازع کو مزید پیچیدہ بنا دیا ہے۔
