واشنگٹن (لارڈ میڈیا): امریکی نائب صدر جے ڈی وینس کی سکیورٹی ٹیم سے وابستہ ایک خفیہ سروس اہلکار کے خلاف تحقیقات کا آغاز ہو گیا ہے۔ اہلکار پر الزام ہے کہ اس نے نائب صدر کے سفری انتظامات سے متعلق حساس معلومات میڈیا کو فراہم کیں۔
امریکی خفیہ سروس کے ترجمان انتھونی گگلیلمی نے تصدیق کی ہے کہ نائب صدر کے حفاظتی یونٹ کے ایک رکن کے خلاف انتظامی تحقیقات جاری ہیں اور ممکنہ طور پر فوجداری تحقیقات بھی کی جا سکتی ہیں۔
ترجمان کے مطابق اہلکار پر آپریشنل اور معلوماتی سکیورٹی کے ضوابط کی خلاف ورزی کے الزامات ہیں۔ انہوں نے کہا کہ ایسی سرگرمیوں کو برداشت نہیں کیا جائے گا جو سرکاری شخصیات کی سلامتی کو خطرے میں ڈال سکتی ہیں۔
یہ معاملہ اس وقت سامنے آیا جب ایک امریکی نشریاتی ادارے نے رپورٹ شائع کی کہ نائب صدر جے ڈی وینس اپنی سکیورٹی ٹیم سے بعض ذاتی نوعیت کے سفری انتظامات کی درخواست کرتے رہے ہیں، جس پر بعض اہلکار ناراضی کا اظہار کر رہے تھے۔
رپورٹ کے مطابق جے ڈی وینس اپنے بیٹے کو گالف کی تربیت کے لیے محفوظ گالف کورس تک فوجی ہیلی کاپٹر کے ذریعے لے جانا چاہتے تھے۔ اس مقصد کے لیے ’میرین ٹو‘ نامی ہیلی کاپٹر استعمال کرنے کی تجویز زیر غور تھی، تاہم خراب موسم کے باعث یہ پرواز منسوخ کر دی گئی۔
تاحال جے ڈی وینس کے دفتر کی جانب سے اس رپورٹ پر کوئی تفصیلی ردعمل سامنے نہیں آیا، جبکہ تحقیقات مکمل ہونے تک خفیہ سروس نے مزید تبصرہ کرنے سے گریز کیا ہے۔
