کیلیفورنیا (لارڈ میڈیا): ایپل کی جانب سے ستمبر 2026 میں اپنی تاریخ کی سب سے بڑی آئی فون اپ ڈیٹ متعارف کرائے جانے کی توقع ہے، جس میں آئی فون 18 پرو، آئی فون 18 پرو میکس اور پہلا فولڈیبل آئی فون شامل ہوں گے۔
بلومبرگ کے معروف صحافی مارک گورمن سمیت مختلف ذرائع نے کہا ہے کہ ایپل نئی نسل کے آئی فونز، فولڈیبل ڈیوائسز اور مصنوعی ذہانت پر مبنی نئی مصنوعات پر کام کر رہا ہے۔ تاہم، کمپنی نے باضابطہ طور پر ان منصوبوں کی تصدیق نہیں کی۔
رپورٹس کے مطابق ایپل کی سالانہ لانچ تقریب 8 یا 9 ستمبر 2026 کو منعقد ہو سکتی ہے، جبکہ متحدہ عرب امارات ان ابتدائی ممالک میں شامل ہو سکتا ہے جہاں تقریب کے فوراً بعد نئے آئی فونز کی پری آرڈر بکنگ شروع ہو گی۔
ذرائع کے مطابق ایپل اس بار آئی فون سیریز کو دو مراحل میں متعارف کر سکتا ہے۔ پہلے مرحلے میں آئی فون 18 پرو، آئی فون 18 پرو میکس اور فولڈیبل آئی فون لانچ کیے جائیں گے، جبکہ معیاری آئی فون 18 اور دیگر ماڈلز 2027 کے آغاز میں پیش کیے جا سکتے ہیں۔
ڈیزائن کے لحاظ سے آئی فون 18 پرو سیریز موجودہ ماڈلز سے مشابہ ہو سکتی ہے، مگر بڑے کیمرا ماڈیول، زیادہ طاقتور بیٹری اور نئے رنگ متعارف کرائے جا سکتے ہیں۔
ایپل کا پہلا فولڈیبل آئی فون بھی اسی تقریب میں پیش کیے جانے کی توقع ہے، جس میں مضبوط ہنج اور پائیداری پر توجہ دی گئی ہے۔
قیمتوں کے حوالے سے آئی ڈی سی کی سینئر ڈائریکٹر نبیلہ پوپل نے کہا ہے کہ آئی فون 18 پرو سیریز کی قیمت میں 200 ڈالر تک اضافہ ہو سکتا ہے، جس کے بعد یہ ایپل کی مہنگی ترین مین اسٹریم سیریز بن سکتی ہے۔
