لندن (لارڈ میڈیا): برطانوی اخبار فنانشل ٹائمز نے انکشاف کیا ہے کہ ایران نے مشرق وسطیٰ میں امریکی فوجی اہلکاروں اور کنٹریکٹرز کے موبائل فونز کی لوکیشن معلوم کرنے کی کوشش کی۔ اس رپورٹ کے بعد امریکی قانون سازوں میں فوجی اہلکاروں کی ڈیجیٹل سکیورٹی کے متعلق خدشات بڑھ گئے ہیں۔
رپورٹ کے مطابق ایران نے جنگ سے قبل اور دورانِ جنگ امریکی اہلکاروں کی نقل و حرکت پر نظر رکھنے کے لیے موبائل فون ٹریکنگ کی مربوط مہم چلائی۔ مختلف ٹیلی کام نیٹ ورکس نے ایسے سگنلز، جنہیں ایس ایس 7 پنگز کہا جاتا ہے، بلاک کیے۔
یہ سرگرمیاں فروری کے آخر میں ایران پر امریکا اور اسرائیل کے حملوں سے قبل شروع ہوئیں اور جنگ کے ابتدائی دنوں تک جاری رہیں۔ ایران نے اس دوران امریکی فوجی اڈوں پر حملے کیے۔
خلیجی ممالک کے بعض حکام کو شبہ تھا کہ ایران نے مقامی موبائل آپریٹرز کے رومنگ معاہدوں سے فائدہ اٹھا کر امریکی اہلکاروں کی موجودگی کا سراغ لگانے کی کوشش کی۔
امریکی سینٹرل کمانڈ نے کانگریس کو آگاہ کیا کہ مخالف عناصر تجارتی لوکیشن ڈیٹا استعمال کر کے امریکی اہلکاروں کی نگرانی کی کوشش کر رہے ہیں۔ تاہم، سینٹ کام نے اہلکاروں کے تحفظ کے لیے اقدامات کیے۔
رپورٹ میں بتایا گیا کہ ایران نے تجارتی اشتہاری ٹیکنالوجی کے ذریعے ان ہوٹلوں کی نشاندہی کرنے کی کوشش کی جہاں امریکی سرکاری ملازمین موجود تھے۔
امریکی سینیٹر رون وائیڈن اور ریپبلکن رکن پیٹ ہیریگن نے ٹیکنالوجی کمپنیوں پر زور دیا کہ وہ سرکاری ملازمین کی لوکیشن سے متعلق معلومات فروخت نہ کریں۔ لندن میں ایرانی سفارت خانے نے تبصرے کی درخواست پر کوئی جواب نہیں دیا۔
