اسلام آباد (لارڈ میڈیا): وفاقی وزیر پیٹرولیم علی پرویز ملک نے کہا ہے کہ آبنائے ہرمز کی دوبارہ بندش سے عالمی منڈیوں میں غیریقینی صورتحال پیدا ہوگئی ہے۔ اس صورتحال کے پیش نظر پیٹرولیم قیمتوں کے تعین کے نظام میں اصلاحات کی کمیٹی نے مختلف طریقہ کار پر غور شروع کر دیا ہے۔
کمیٹی کے اجلاس کے اعلامیے کے مطابق پیٹرولیم پرائس اسٹیبلائزیشن فنڈ کو قواعد پر مبنی نظام کے تحت چلانے پر اتفاق کیا گیا ہے۔ مزید برآں، اوگرا کو قیمتوں کا ڈیٹا روزانہ کی بنیاد پر ویب سائٹ پر اپ لوڈ کرنے کی سفارش دی گئی ہے تاکہ عوام کو بروقت معلومات میسر ہوں۔
اجلاس کے شرکاء نے تیل کی سپلائی چین کی ڈیجیٹلائزیشن پر بھی اتفاق کیا اور شفافیت بڑھانے کی اہمیت پر زور دیا۔ وزیر پیٹرولیم نے کہا کہ موجودہ صورتحال میں کمیٹی کی ذمہ داری مزید اہم ہو گئی ہے۔
علی پرویز ملک نے مزید کہا کہ درآمدی ڈیزل پر انحصار کم کرنے کے لیے ریفائنری پالیسی میں ترامیم تجویز کی گئی ہیں، جس سے مقامی ڈیزل کی پیداوار میں اضافہ ہوگا اور پاکستان کی توانائی سلامتی کو مزید مضبوط بنایا جا سکے گا۔
وزیرِ پیٹرولیم کی زیرِ صدارت اجلاس میں روزانہ کی بنیاد پر قیمتوں کے تعین پر غور کیا گیا ہے۔ کمیٹی اپنی سفارشات وزیراعظم کو پیش کرے گی، جن کی روشنی میں پیٹرولیم قیمتوں کے تعین کا نیا طریقہ کار طے کیا جائے گا۔
