کراچی (لارڈ میڈیا): عالمی منڈی میں خام تیل کی قیمتوں میں نمایاں کمی دیکھی گئی ہے، جس کے باعث پاکستان میں پیٹرولیم مصنوعات کی قیمتوں میں بھی بڑی کمی متوقع ہے۔ حالیہ کمی کے بعد برینٹ خام تیل کی قیمت گزشتہ چار ماہ کی کم ترین سطح پر پہنچ گئی، جو 70.65 ڈالر فی بیرل پر بند ہوئی۔
توانائی کی عالمی منڈی میں سرمایہ کاروں کی محتاط حکمت عملی، عالمی معیشت میں سست روی کے خدشات اور تیل کی طلب میں ممکنہ کمی کے باعث خام تیل کی قیمتوں پر دباؤ برقرار رہا۔
گورنر اسٹیٹ بینک نے کہا ہے کہ پیٹرولیم مصنوعات کی قیمتوں میں اضافے کی وجہ سے مہنگائی ہماری توقعات سے زیادہ رہی۔
ماہرین کے مطابق عالمی منڈی میں خام تیل کی قیمتوں میں مسلسل اتار چڑھاؤ دیکھا جا رہا ہے، تاہم تازہ کمی نے قیمتوں کو گزشتہ چار ماہ کی کم ترین سطح تک پہنچا دیا ہے۔
معاشی تجزیہ کاروں کا کہنا ہے کہ بڑی معیشتوں میں صنعتی سرگرمیوں کی رفتار سست ہونے کے خدشات، تجارتی غیر یقینی صورتحال اور تیل کی طلب میں ممکنہ کمی نے سرمایہ کاروں کو محتاط رویہ اختیار کرنے پر مجبور کیا ہے۔
حافظ نعیم الرحمان نے کہا ہے کہ تیل کی عالمی قیمتیں کم ہونے پر پاکستان میں پیٹرول کی قیمت 225 روپے فی لیٹر کی جائے۔
توانائی کے شعبے سے وابستہ ماہرین کا کہنا ہے کہ آئندہ چند روز کے دوران عالمی معاشی اشاریے، بڑے تیل پیدا کرنے والے ممالک کی پالیسی، طلب و رسد کی صورتحال اور جغرافیائی سیاسی حالات خام تیل کی قیمتوں کی سمت کا تعین کریں گے۔
