بیجنگ (شِنہوا) چین کے نائب صدر ہان ژینگ نے بیجنگ میں امریکہ کی سابق وزیر ٹرانسپورٹیشن ایلین چاؤ سے ملاقات کے دوران چین-امریکہ تعلقات کو مزید مضبوط بنانے کے لئے کوششیں تیز کرنے پر زور دیا ہے۔
ہان نے کہا کہ چین اور امریکہ کے سربراہان مملکت نے سٹریٹجک استحکام پر مبنی تعمیری چین-امریکہ تعلقات کے ایک نئے وژن پر اتفاق کیا ہے، جو مستقبل کے دوطرفہ تعلقات کے لئے اہم تزویراتی رہنمائی فراہم کرتا ہے۔
اس بات پر زور دیتے ہوئے کہ چین ہمیشہ سے مستحکم چین-امریکہ تعلقات کو فروغ دینے کے لئے پرعزم رہا ہے، ہان نے کہا کہ دونوں سربراہان مملکت کے درمیان طے پانے والے اتفاق رائے پر عملدرآمد کے لئے دونوں اطراف کے تمام شعبوں کے مشترکہ اقدامات کی ضرورت ہے۔
انہوں نے دوطرفہ تعلقات کی ترقی کو مضبوط سہارا دینے کے لئے دیگر شعبوں کے ساتھ ساتھ خاص طور پر معیشت اور تجارت میں تعاون کو مزید بڑھانے اور ثقافتی، عوامی اور علاقائی سطح پر روابط کو گہرا کرنے پر زور دیا۔
ایلین چاؤ نے کہا کہ امریکہ اور چین کے درمیان مستحکم تعلقات کو برقرار رکھنا تمام فریقین کے مفاد میں ہے۔ انہوں نے امریکہ اور چین کے مابین عملی تعاون اور عوامی روابط کو فروغ دینے کے لئے اپنی کوششیں جاری رکھنے کی خواہش کا اظہار کیا۔
