شنگھائی (شِنہوا) شنگھائی ڈزنی لینڈ اپنی 10ویں سالگرہ منا رہا ہے اور اس موقع پر یہ تفریحی مقام مزید توسیعی منصوبوں کو آگے بڑھا رہا ہے۔ اکتوبر 2025 کے آخر تک یہ پارک 10 کروڑ سے زائد مہمانوں کا خیرمقدم کرچکا ہے ۔
پیر کے روز شنگھائی ڈزنی تفریحی مقام کے صدر اور جنرل منیجر اینڈریو بولسٹین نے شنگھائی ڈزنی لینڈ کے سپائیڈر مین تھیم پر مبنی نئے علاقے کے بارے میں مزید تفصیلات فراہم کیں جو پارک کا 9 واں موضوعاتی زون ہوگا۔ اس پرکشش مقام کا آخری حصہ یعنی اس کا مشہور سرخ ٹریک حال ہی میں نصب کیا گیا ہے۔
اس کے علاوہ تفریحی مقام کا تیسرا ہوٹل، شنگھائی ڈزنی اینچانٹڈ سٹار ہوٹل اس موسم سرما میں کھولے جانے کی توقع ہے۔
شنگھائی میں سیاحت کے تیزی سے بڑھتے ہوئے رجحان کے باعث پارک کو فائدہ ہوا ہے اور اس نے شہر میں 15 ہزار سے زائد براہ راست روزگار بھی پیدا کئے ہیں۔
مقامی ثقافت اور سیاحت کے حکام نے بتایا کہ 2011 میں جب شنگھائی ڈزنی سیاحتی مقام کی تعمیر شروع ہوئی تھی اس وقت شنگھائی میں 23 کروڑ ملکی سیاح آئے تھے اور سیاحت کی آمدن تقریباً 278.6 ارب یوآن (تقریباً 40.92 ارب امریکی ڈالر) تھی۔ 2025 تک یہ تعداد بڑھ کر41 کروڑ 60 لاکھ سیاح اور آمدن566.68 ارب یوآن تک پہنچ گئی۔
چین میں بغیر ویزا داخلے کی توسیعی پالیسیوں کے باعث بڑھتی ہوئی غیر ملکی سیاحت نے بھی شنگھائی ڈزنی لینڈ میں آنے والے سیاحوں خاص طور پر جاپان، جمہوریہ کوریا اور جنوب مشرقی ایشیائی ممالک کے سیاحوں کی آمد میں نمایاں اضافہ کیا ۔
پارک کی دو مرتبہ سیر کرنے والی تھائی سیاح اوم نے کہا کہ انہیں شنگھائی کا خوشگوار موسم، مناسب اخراجات اور آسان ٹرانسپورٹ نظام بہت پسند آیا۔ ان کے مطابق پارک میں دلچسپ جھولے، مختلف تفریحی سرگرمیاں اور کھانوں کے وسیع انتخاب موجود ہیں۔
موسم بہار سے شنگھائی ڈزنی تفریحی مقام اپنی 10ویں سالگرہ کے سلسلے میں متعدد تقریبات منعقد کر رہا ہے۔ موسم گرما کی تعطیلات کے قریب آنے کے ساتھ شنگھائی کے ڈزنی تفریحی مقام سمیت تمام موضوعاتی پارکس میں سیاحوں کی تعداد میں مزید اضافے کی توقع ہے۔
