کراچی (لارڈ میڈیا): کراچی کے علاقے گلستانِ جوہر میں پولیس نے منشیات فروشی کے الزامات میں ایک خطرناک خاتون کو اس کے دو بیٹوں سمیت گرفتار کر لیا ہے۔ پولیس حکام کے مطابق ملزمہ کو کامران چورنگی کے قریب حراست میں لیا گیا جب وہ منشیات کی سپلائی کر رہی تھی۔
پولیس کا کہنا ہے کہ گرفتار ملزمہ نے ماضی میں سہراب گوٹھ میں منشیات کا بڑا نیٹ ورک چلایا تھا۔ پولیس کے مسلسل چھاپوں کے بعد، وہ گلستانِ جوہر منتقل ہو گئی تھی جہاں اس نے کھڑکی سے منشیات فراہم کرنے کا طریقہ اپنایا تھا تاکہ گرفتاری سے بچ سکے۔
ملزمہ کے خلاف پہلے ہی 35 مقدمات درج ہیں، اور وہ ہیروئن، چرس اور دیگر منشیات کے کاروبار میں ملوث ہے۔ پولیس کے مطابق ملزمہ ماضی میں بھی گرفتار ہو کر جیل جا چکی ہے اور دو سال قبل رہا ہوئی تھی۔
پولیس حکام نے بتایا کہ ملزمہ کے شوہر اور دونوں بیٹوں پر بھی متعدد مقدمات درج ہیں۔ پولیس نے ملزمہ اور اس کے بیٹوں کو حراست میں لے کر مزید تفتیش شروع کر دی ہے تاکہ دیگر کارندوں اور منشیات کے ذرائع کا سراغ لگایا جا سکے۔
