گوانگ ژو، شین زین، ہانگ کانگ ایکسپریس ریل لنک کے ہانگ کانگ سیکشن پر سال 2026 میں یومیہ مسافروں کی تعداد میں مسلسل اضافہ دیکھا گیا۔اپریل تک روزانہ اوسطاً 90 ہزار سے زائد مسافروں نے اس سیکشن پر سفر کیا جو سال 2025 کی 80 ہزار یومیہ اوسط سے زیادہ ہے۔
ایم ٹی آر کارپوریشن لمیٹڈ کے جاری کردہ اعدادوشمار کے مطابق اختتام ہفتہ اور سرکاری تعطیلات پر مسافروں کی یومیہ تعداد نمایاں اضافے کے ساتھ عموماً ایک لاکھ سے تجاوز کر جاتی ہے۔
سال 2026 میں ایکسپریس ریل لنک کے آغاز کے بعد دو مواقع ایسے آئے جب مسافروں کی یومیہ تعداد کا نیا ریکارڈ قائم ہوا۔ 19 فروری کو نئے چینی سال کے تیسرے روز ایک لاکھ 45 ہزار 800 جبکہ 4 اپریل کو ایسٹر اور چِنگ مِنگ تہوار کی تعطیلات کے دوران ایک لاکھ 48 ہزار 700 مسافروں نے اس ہائی اسپیڈ ریل سروس پر سفر کیا۔
ہانگ کانگ خصوصی انتظامی خطے(ایچ کے ایس آر) کی حکومت کی ٹرانسپورٹ اور لاجسٹکس سیکرٹری میبل چان نے بدھ کے روز قانون ساز کونسل کو بتایا کہ ایم ٹی آر کارپوریشن لمیٹڈ ہانگ کانگ ویسٹ کولون اسٹیشن پر سہولیات کا مسلسل جائزہ لے کر انہیں بہتر بنا رہی ہے۔
ہانگ کانگ خصوصی انتظامی خطے کی حکومت ایم ٹی آر کارپوریشن لمیٹڈ اور چین کے مین لینڈ کے متعلقہ حکام کے ساتھ فعال طور پر بات چیت کر رہی ہے تاکہ اسٹیشن کے “کو لوکیشن انتظام” کے تحت دکانوں کے آپریشنل اور معاون انتظامات کو آگے بڑھاتے ہوئے ایم ٹی آر کارپوریشن لمیٹڈ کی خدمات کو بہتر بنایا جا سکے۔
ہانگ کانگ سیکشن 23 ستمبر 2018 کو آپریشنل ہوا تھا۔ اسے قومی ہائی اسپیڈ ریل نیٹ ورک سے منسلک کیا گیا جس کی مجموعی لمبائی اس وقت 50 ہزار کلومیٹر سے زیادہ ہے۔ جنوری 2026 سے ہانگ کانگ ویسٹ کولون اسٹیشن سے براہِ راست قابلِ رسائی چینی مین لینڈ کے شہروں کی تعداد 110 تک پہنچ گئی ہے۔ افتتاح کے وقت یہ تعداد 44 تھی ۔
سال 2025 میں ہانگ کانگ سیکشن پر مسافروں کی سالانہ تعداد 3 کروڑ سے تجاوز کر گئی تھی جبکہ اب تک مجموعی طور پر 10 کروڑ سے زائد مسافروں نے اس پر سفر کیا ہے۔
ہانگ کانگ، چین سے شِنہوا نیوز ایجنسی کے نمائندوں کی رپورٹ
