قاہرہ (شِنہوا) شِنہوا نیوز ایجنسی کے صدر فو ہوا نے گلوبل ساؤتھ میڈیا اینڈ تھنک ٹینک فورم کی چائنیز-عرب پارٹنرشپ کانفرنس کے بعض شرکاء سے ملاقات کی جو 12 سے 13 مئی تک قاہرہ میں منعقد ہو رہی ہے۔
فو ہوا نے مہمانوں کا خیرمقدم کیا جن میں عراقی نیوز ایجنسی (آئی این اے) کے ڈائریکٹر جنرل ستار شریف، لبنانی وزارت اطلاعات کے ڈائریکٹر جنرل حسن فلحہ اور یمن کے نائب وزیر برائے اطلاعات، ثقافت و سیاحت حسین باسلیم شامل تھے۔ انہوں نے اس بات پر زور دیا کہ شِنہوا عراق، لبنان اور یمن کی کوریج کو بہت اہمیت دیتا ہے۔
شِنہوا کے سربراہ نے مختلف ممالک کی میڈیا تنظیموں اور سرکاری اداروں کے ساتھ مل کر میڈیا تعاون کو فروغ دینے اور خبر رسانی، تکنیکی اختراع، عملے کے تبادلے اور ثقافتی رابطے جیسے شعبوں میں تعاون کو مزید گہرا کرنے کی خواہش ظاہر کی۔ انہوں نے کہا کہ اس تعاون کا مقصد چین اور عرب ممالک کی مشترکہ کہانی بیان کرنا ہے جو مشترکہ مستقبل کی حامل ایک برادری کی تعمیر کے لئے مل کر کام کر رہے ہیں اور گلوبل ساؤتھ ممالک کی امن، استحکام، آزاد ترقی اور تہذیبوں کے تحفظ کی کوششوں کو اجاگر کرنا ہے تاکہ چینی اور عرب عوام کے درمیان افہام و تفہیم اور دوستی کو فروغ دیا جا سکے۔
شِنہوا نیوز ایجنسی کے صدر فو ہوا مصر کے دارالحکومت قاہرہ میں عراقی نیوز ایجنسی (آئی این اے) کے ڈائریکٹر جنرل ستار شریف سے ملاقات کر رہے ہیں۔(شِنہوا)
ستار شریف نے کہا کہ عراقی نیوز ایجنسی (آئی این اے) شِنہوا کے ساتھ اپنے دوستانہ تعاون پر مبنی تعلقات کو بہت اہمیت دیتی ہے اور عالمی خبروں کی رپورٹنگ میں اس کی پیشہ ورانہ مہارت اور اثر و رسوخ کو بے حد سراہتی ہے۔
انہوں نے مزید کہا کہ عراقی نیوز ایجنسی شِنہوا کے ساتھ تعاون کو مزید وسعت دینے کے لئے تیار ہے تاکہ عراق-چین دوستی کی کہانی کو مل کر بیان کیا جا سکے جو دونوں ممالک کے عوام کے درمیان باہمی مفاہمت اور قربت کے گواہ اور فروغ دہندہ کے طور پر کام کرے گی۔
شِنہوا نیوز ایجنسی کے صدر فو ہوا مصر کے دارالحکومت قاہرہ میں لبنان کی وزارت اطلاعات کے ڈائریکٹر جنرل حسن فلحہ سے ملاقات کر رہے ہیں۔(شِنہوا)
حسن فلحہ نے کہا کہ صحافت میں شِنہوا کی ایک طویل روایت ہے اور نیوز ٹیکنالوجی میں اسے وسیع مہارت حاصل ہے جو عرب میڈیا کے لئے ایک قیمتی حوالہ ہے۔ انہوں نے امید ظاہر کی کہ دونوں فریق تجربات کے تبادلے کو مزید بڑھائیں گے اور تعاون کو مزید گہرا کریں گے تاکہ لبنان-چین میڈیا تعلقات میں مزید ترقی حاصل کی جا سکے۔
حسین باسلیم نے بھی یمن اور علاقائی حالات و واقعات پر شِنہوا کی دیرینہ اور غیر جانبدارانہ رپورٹنگ کی تعریف کی اور کہا کہ شِنہوا کی یمنی میڈیا اداروں کے ساتھ دوستانہ تعاون کی ایک طویل تاریخ ہے اور یمن کے میڈیا اور عوام میں اس کی اچھی ساکھ ہے۔
انہوں نے پیشہ ورانہ تبادلوں اور میڈیا ٹیکنالوجی جیسے شعبوں میں شِنہوا کے ساتھ تعاون کو گہرا کرنے کی خواہش ظاہر کی تاکہ دوطرفہ میڈیا تعاون کو نئی سطح پر لے جایا جا سکے۔
گلوبل ساؤتھ میڈیا اینڈ تھنک ٹینک فورم کی چائنیز-عرب پارٹنرشپ کانفرنس کی مشترکہ میزبانی شِنہوا نیوز ایجنسی اور عرب لیگ کر رہے ہیں۔ کانفرنس کے دوران شرکاء پرامن ترقی، متنوع بیانیے، ڈیجیٹل اختراع اور تہذیبوں کے درمیان علمی تبادلے کے عمل پر تفصیلی تبادلہ خیال کریں گے۔
