بیروت (شِنہوا) یونیسکو کی پیر کو جاری کردہ ایک رپورٹ میں خبردار کیا گیا ہے کہ خطے میں بڑھتا ہوا تنازع عرب ممالک میں تعلیم کو شدید متاثر کر رہا ہے، جس سے 10 کروڑ سے زائد بچے متاثر ہوئے ہیں اور کمزور تعلیمی نظام تباہی کے دہانے پر پہنچ گیا ہے۔
رپورٹ کے مطابق کم از کم 15 ممالک میں تعلیم متاثر ہوئی ہے، جہاں سکولوں کی بندش، محدود رسائی یا آن لائن تعلیم کی طرف منتقلی کے باعث سکول جانے کی عمر کے 5 کروڑ 20 لاکھ بچوں کی تعلیم میں خلل پڑا ہے۔ کشیدگی میں اضافے سے قبل ہی خطے میں تقریباً 3 کروڑ بچے سکولوں سے باہر تھے۔
رپورٹ کے مطابق غزہ پٹی میں تعلیمی نظام تقریباً مکمل طور پر تباہ ہو چکا ہے، جہاں 97.5 فیصد سکول نقصان کا شکار یا تباہ ہو چکے ہیں اور 6 لاکھ 37 ہزار سے زائد بچے تعلیم سے محروم ہیں۔
لبنان بھی شدید متاثر ہوا ہے، جہاں 1100 سے زائد سرکاری سکول پناہ گاہوں کے طور پر استعمال ہو رہے ہیں جبکہ کم از کم 570 سکول بند ہیں یا تنازع والے علاقوں میں واقع ہیں، جس سے 2 لاکھ 40 ہزار سے زائد طلبہ کی تعلیم متاثر ہوئی ہے۔
شام میں لبنان سے واپس آنے والوں کی بڑی تعداد نے بحران کو مزید پیچیدہ بنا دیا ہے، جس سے پہلے ہی کمزور نظام پر دباؤ بڑھ گیا ہے۔ بہت سے واپس آنے والے افراد کو فوری تعلیمی سہولیات درکار ہیں، لیکن سکول یا تو گنجائش سے زیادہ بھر چکے ہیں یا پناہ گاہوں کے طور پر استعمال ہو رہے ہیں، جس کے باعث طلبہ کا تعلیمی وقت ضائع ہو رہا ہے اور دوبارہ داخلے کے مواقع محدود ہو گئے ہیں۔
اس کے اثرات کشیدہ علاقوں سے باہر بھی محسوس کئے جا رہے ہیں۔ عراق میں تقریباً 7 ہزار 500 سکول، جو 20 لاکھ طلبہ کو خدمات فراہم کرتے ہیں، آن لائن تعلیم کی طرف منتقل ہو گئے ہیں، جبکہ خلیجی ممالک نے احتیاطی تدابیر کے طور پر عارضی بندش اور فاصلاتی تعلیم نافذ کی ہے۔
یونیسکو نے خبردار کیا ہے کہ فوری اقدامات نہ کئے گئے تو خطہ انسانی وسائل کے ناقابل تلافی نقصان اور ایک "کھوئی ہوئی نسل” کا سامنا کر سکتا ہے۔
