جکارتہ (شِنہوا) چین اور آسیان کے درمیان آفات سے نمٹنے میں تعاون کے منصوبے کا افتتاح ہو گیا جس کی افتتاحی تقریب انڈونیشیا کے دارالحکومت جکارتہ میں واقع آسیان سیکرٹریٹ میں منعقد ہوئی۔
تقریب میں آسیان کے سیکرٹری جنرل کاؤ کم ہورن، آسیان میں چین کے سفیر وانگ چھنگ، آفات سے نمٹنے کے متعلق آسیان کمیٹی کے حکام اور رکن ممالک کے مستقل نمائندوں نے شرکت کی۔
کاؤ نے تقریب سے خطاب کرتے ہوئے کہا کہ ’’یہ تقریب آسیان اور چین کے درمیان شراکت داری میں ایک نئے باب کا آغاز ہے جو آفات سے نمٹنے میں عملی تعاون پر مبنی ہے۔ گزشتہ برسوں میں دونوں فریقین نے ایک مضبوط اور متحرک تعلق قائم کیا ہے۔‘‘
وانگ چھنگ نے کہا کہ چین اور آسیان ممالک پہاڑوں اور سمندروں کے ذریعے جڑے ہوئے ہیں اور حالیہ برسوں میں مختلف شعبوں میں عملی تعاون کے نتیجے میں نمایاں کامیابیاں حاصل ہوئی ہیں جن سے دونوں اطراف کے عوام کو حقیقی فوائد پہنچے ہیں۔
وانگ نے کہا کہ چین نے آسیان ممالک میں قدرتی آفات کے دوران کئی مواقع پر ہنگامی امداد فراہم کی جو ہمسایہ ممالک کے درمیان باہمی تعاون کے مضبوط رشتے کی عکاسی کرتی ہے اور انسانیت کے مشترکہ مستقبل کی حامل برادری کی تعمیر کی ایک مثال پیش کرتی ہے۔
