چین کی معیشت کو سہارا دینے میں بڑی صوبائی معیشتیں ایک کلیدی قوت ثابت ہوئی ہیں۔ یہ صوبائی معیشتیں ملک کی معاشی نمو کو مستحکم رکھنے کی اہم ذمہ داری نبھاتی ہیں۔
چین کے معاشی طور پر طاقتور صوبوں گوانگ ڈونگ اور ژے جیانگ نے سال 2026 کی پہلی سہ ماہی میں غیر ملکی تجارت میں مضبوط ترقی دکھائی ہے۔ گوانگ ڈونگ کی تاریخ میں پہلی بار ایسا ہوا کہ اس کی سہ ماہی درآمدات 10 کھرب یوآن (تقریباً 145.7 ارب امریکی ڈالر) سے تجاوز کر گئی ہیں۔
گوانگ ڈونگ غیر ملکی تجارت کے حوالے سے چین کا سب سے بڑا صوبہ ہے جو ملک کی مجموعی غیر ملکی تجارت اور درآمدات کا تقریباً پانچواں حصہ رکھتا ہے۔
گوانگ ڈونگ نے پہلی سہ ماہی میں عددی کنٹرول مشین ٹولز، مربوط برقی چپس اور کمپیوٹر کے پرزہ جات کی درآمدات میں اضافہ دیکھا۔
خاص بات یہ ہے کہ ہوائی جہاز کے پرزہ جات اور گاڑیوں کے انجن کی درآمدات میں بالترتیب 53.3 فیصد اور 70.1 فیصد کا نمایاں اضافہ ہوا جو جدید پیداواری شعبوں میں بنیادی پرزہ جات اور اعلیٰ معیار کے آلات کی مضبوط طلب کی عکاسی کرتا ہے۔
اسی دوران چین کی صارف دوست پالیسیوں کے مسلسل اثرات کے باعث روزمرہ استعمال کی اشیاء کی درآمدات میں بھی اضافہ ہوا۔
نجی کمپنیاں گوانگ ڈونگ کی تجارت میں بدستور ریڑھ کی ہڈی ثابت ہوئیں جن کی درآمدات اور برآمدات 25.5 فیصد اضافے کے ساتھ 16.9 کھرب یوآن تک پہنچ گئیں۔ یہ صوبے کی مجموعی تجارت کا 66.6 فیصد بنتی ہیں۔
چین کے مشرقی صوبے ژے جیانگ میں غیر ملکی تجارت پہلی سہ ماہی میں 7.1 فیصد اضافے کے ساتھ 13.8 کھرب یوآن تک پہنچ گئی جبکہ برآمدات 10.4 کھرب یوآن کی ریکارڈ سطح تک پہنچیں۔
مشینری اور برقی مصنوعات کی برآمدات 7.1 فیصد اضافے کے ساتھ 493.44 ارب یوآن تک پہنچ گئیں جو صوبے کی مجموعی برآمدات کا 47.6 فیصد ہیں۔
بجلی سے چلنے والی گاڑیوں کی برآمدات 90.7 فیصد جبکہ لیتھیم بیٹریوں کی برآمدات 124.2 فیصد کے بلند ترین اضافوں کے ساتھ بالترتیب 16.65 ارب یوآن اور 12.57 ارب یوآن تک پہنچ گئیں۔
ژے جیانگ میں نجی کمپنیوں نے اس عرصے کے دوران 10.4 کھرب یوآن کی درآمدات اور برآمدات کیں جو 8.6 فیصد کا سالانہ اضافہ ہے اور یہ صوبے کی مجموعی تجارت کا 82.4 فیصد بنتا ہے۔
بیجنگ سے شِنہوا نیوز ایجنسی کے نمائندوں کی رپورٹ
۔۔۔۔۔۔۔۔۔۔۔۔۔۔
ٹیکسٹ آن سکرین:
چین کی دو بڑی صوبائی معیشتوں کا ملکی ترقی میں کلیدی کردار
گوانگ ڈونگ اور ژے جیانگ نے غیر ملکی تجارت میں مضبوط اضافہ دکھایا
رواں برس کی پہلی سہ ماہی میں دونوں صوبوں کی تجارتی کارکردگی شاندار رہی
جدید مشینری اور الیکٹرانک مصنوعات کی درآمدات میں نمایاں اضافہ ہوا
ہوائی جہاز کے پرزہ جات اور انجن کی درآمدات میں بھی بڑی تیزی دیکھی گئی
صارف دوست پالیسیوں سے روزمرہ اشیاء کی درآمدات میں اضافہ جاری
گوانگ ڈونگ کی درآمدات پہلی بار 10 کھرب یوآن سے تجاوز کر گئیں
چین کی مجموعی غیر ملکی تجارت میں جنوب مشرقی صوبے کا پانچواں حصہ ہے
نجی کمپنیاں گوانگ ڈونگ کی تجارت میں ریڑھ کی ہڈی کا کردار ادا کر رہی ہیں
ژے جیانگ کی غیر ملکی تجارت 13.8 کھرب یوآن تک پہنچ گئی
مشینری اور برقی مصنوعات صوبے کی مجموعی برآمدات کا 47.6 فیصد ہیں
