پاکستان نے امریکا اور ایران کے وفود کی اسلام آباد آمد کے پیش نظر سیکیورٹی اور انتظامی تیاریاں سخت کر دی ہیں۔ یہ مذاکرات مشرقِ وسطیٰ میں کشیدگی کم کرنے کے لیے ہو رہے ہیں جو حالیہ دو ہفتے کی جنگ بندی کے بعد منعقد کیے جا رہے ہیں۔
توقع ہے کہ ان مذاکرات میں دونوں ممالک کے اعلیٰ حکام شریک ہوں گے تاکہ کئی ہفتوں سے جاری کشیدگی کے بعد طویل المدتی سفارتی حل تلاش کیا جا سکے۔
وزیرِ داخلہ محسن نقوی کا کہنا ہے کہ غیر ملکی وفود کی فول پروف سیکیورٹی کے لیے جامع منصوبہ تیار کر لیا گیا ہے۔
اسلام آباد میں مذاکرات سے قبل وسیع پیمانے پر سیکیورٹی اقدامات نافذ کیے گئے ہیں۔
اسلام آباد اور راولپنڈی میں انتظامات کے لیے مقامی تعطیلات کا اعلان کیا گیا ہے۔
پولیس، نیم فوجی دستے اور دیگر سیکیورٹی ادارے بلیو بک وی وی آئی پی پروٹوکول کے تحت تعینات ہیں جبکہ غیر ملکی وفود کی آمد و رفت کے لیے علیحدہ راستے مختص کیے گئے ہیں۔
اسلام آباد پولیس نے ٹریفک ایڈوائزری جاری کرتے ہوئے ایکسپریس ہائی وے پر ممکنہ ٹریفک تبدیلیوں سے آگاہ کیا ہے۔ ریسکیو اداروں اور اسپتالوں کو ہائی الرٹ پر رکھا گیا ہے۔ ریڈ زون میں واقع سرینا ہوٹل کو وفود کے لیے خصوصی طور پر مختص کیا گیا ہے، جبکہ ان کی موجودگی کے دوران شہر کے کئی داخلی راستے بند رہیں گے۔
دونوں فریقوں کو مذاکرات کی میز پر لانے کے لیے وزیرِاعظم شہباز شریف اور نائب وزیرِاعظم و وزیرِ خارجہ محمد اسحاق ڈار نے علاقائی رہنماؤں سے مشاورت کی ہے اور تہران اور واشنگٹن دونوں کے ساتھ سفارتی رابطے برقرار رکھے ہیں۔ تجزیہ کاروں کے مطابق پاکستان کی غیرجانبداری اور تمام فریقوں کے ساتھ دیرینہ تعلقات اسے مذاکرات میں سہولت کاری کے لیے ایک منفرد کردار دیتے ہیں۔
اسلام آباد، پاکستان سے نمائندہ شِنہوا نیوز ایجنسی کی رپورٹ
————————————-
آن سکرین ٹیکسٹ:
امریکا ایران مذاکرات کیلئے اسلام آباد میں سیکیورٹی ہائی الرٹ
اسلام آباد ریڈ زون مکمل سیل، پولیس اور رینجرز کی بھاری نفری تعینات
دو ہفتے کی جنگ بندی کے بعد بڑے سفارتی بریک تھرو کی امید
وی وی آئی پی پروٹوکول کے تحت خصوصی سیکیورٹی پلان نافذ
راولپنڈی اسلام آباد میں مقامی تعطیلات، ٹریفک پلان بھی تبدیل
ایکسپریس ہائی وے پر ڈائیورژن، شہریوں کیلئے ایڈوائزری جاری
سرینا ہوٹل کو غیر ملکی وفود کیلئے مخصوص کر دیا گیا
شہر کے داخلی راستے محدود، متعدد مقامات پر سخت ناکہ بندی
پاکستان کا ثالثی کردار، ایران و امریکا کو مذاکرات کی میز پر لانے کی کوششیں
وزیر اعظم اور دفتر خارجہ کی اعلیٰ سطحی سفارتی رابطے جاری
