واشنگٹن (شِنہوا) وائٹ ہاؤس کے دفتر برائے انتظام و انصرام نے 2027 کے بجٹ کے لئے تجاویز جاری کر دیں جن میں دفاعی اخراجات کو بڑھا کر 15 کھرب امریکی ڈالر کرنے اور ملکی سطح کے پروگراموں میں نمایاں کٹوتیاں شامل ہیں۔
وائٹ ہاؤس کے بجٹ ڈائریکٹر رسل ووٹ کے مطابق بجٹ منصوبے میں قومی دفاع کے لئے پہلے فراہم کردہ "تاریخی 10 کھرب ڈالر کی حد” کو بنیاد بنا کر 2027 کے لئے 15 کھرب ڈالر کی درخواست کی گئی ہے، جو 44 فیصد کا اضافہ ہے۔
دوسری جانب دستاویز کے مطابق یہ بجٹ منصوبہ صدر کے وژن کو آگے بڑھاتے ہوئے غیر دفاعی اخراجات کو محدود رکھنے اور وفاقی حکومت میں اصلاحات جاری رکھنے پر زور دیتا ہے اور 2026 کے غیر دفاعی اخراجات کے مقابلے میں 10 فیصد کمی کی تجویز پیش کرتا ہے۔
بدھ کے روز وائٹ ہاؤس میں ایک تقریب کے دوران امریکی صدر ڈونلڈ ٹرمپ نے دفاعی اخراجات کو ترجیح قرار دیتے ہوئے کہا کہ صحت کی دیکھ بھال جیسے مقامی معاملات کو ریاستوں کے حوالے کیا جانا چاہیے۔
ٹرمپ نے کہا کہ ہم جنگیں لڑ رہے ہیں۔ ہم ڈے کیئر کا بوجھ نہیں اٹھا سکتے۔ آپ کو ریاستوں کو ڈے کیئر کی ذمہ داری سونپنی ہوگی اور انہیں ہی اس کے اخراجات بھی برداشت کرنے چاہئیں۔
صحت سے متعلق پروگراموں میں کٹوتیوں کے علاوہ وائٹ ہاؤس کے بجٹ میں مہاجرین کی آبادکاری کی امداد، قابل تجدید توانائی منصوبوں، یونیورسٹی گرانٹس اور رہائشی پروگراموں میں بھی کمی شامل ہے۔
صدر کا سالانہ بجٹ عام طور پر انتظامیہ کی ترجیحات کی عکاسی کرتا ہے، تاہم حتمی اختیار وفاقی اخراجات پر کانگریس کے پاس ہی ہوتا ہے۔
