بیجنگ (شِنہوا) شنگھائی تعاون تنظیم (ایس سی او) کے رکن ممالک نے مشرق وسطیٰ میں پیش رفت اور ایران کے خلاف مسلح حملے پر گہری تشویش کا اظہار کیا ہے۔
ایران کی صورتحال سے متعلق جاری کردہ بیان میں کہا گیا ہے کہ ایس سی او کے رکن ممالک طاقت کے استعمال کو ناقابل قبول سمجھتے ہیں اور ان کا موقف ہے کہ موجودہ تنازع کا حل صرف مذاکرات، باہمی احترام اور تمام فریقوں کے جائز خدشات کو مدنظر رکھنے میں ہے، جو بین الاقوامی قانون اور اقوام متحدہ کے منشور کے مقاصد و اصولوں پر مبنی ہو۔
ایس سی او کے رکن ممالک نے ایران کی خودمختاری، سلامتی اور علاقائی سالمیت کو یقینی بنانے کی ضرورت پر زور دیا۔ انہوں نے تمام فریقوں سے تحمل کا مظاہرہ کرنے اور ایسی کسی بھی کارروائی کو فوری طور پر روکنے کا مطالبہ کیا جو صورتحال کو مزید خراب کر سکتی ہو۔
رکن ممالک نے اقوام متحدہ اور اس کی سلامتی کونسل پر بھی زور دیا کہ وہ بین الاقوامی امن و سلامتی کو نقصان پہنچانے والے اقدامات سے نمٹنے کے لئے فوری تدابیر اختیار کریں۔
ایس سی او کے رکن ممالک نے حملے کے متاثرین کے اہل خانہ سے دلی تعزیت اور ایران کی حکومت اور عوام کے ساتھ یکجہتی کا اظہار کیا۔
