چیف آف ڈیفنس فورس فیلڈ مارشل سید عاصم منیر نے مستقبل کے میدانِ جنگ کے تقاضوں کیلئے ہر سطح پر اعلی درجے کی تیاری ناگزیر قرار دیتے ہوئے کہا ہے کہ جدید جنگ کی نوعیت میں نمایاں تبدیلی آ چکی، مسلح افواج بڑی تبدیلی کے عمل سے گزر رہی، وطن عزیز کے دفاع کیلئے ہمہ وقت تیار ہیں۔
آئی ایس پی آر سے جاری بیان کے مطابق فیلڈ مارشل سید عاصم منیر نے بہاولپور گریژن کا دورہ کیا جہاں آمد پر کمانڈر بہاولپور کور نے ان کا استقبال کیا، فیلڈ مارشل سید عاصم منیر نے یادگارِ شہدا پر پھول رکھے، فاتحہ خوانی کی اور شہدا کی عظیم قربانیوں کو خراجِ عقیدت پیش کیا۔
فیلڈ مارشل نے خیرپور ٹامیوالی میں بڑے پیمانے پر کی جانے والی تربیتی جنگی مشقوں اسٹیڈ فاسٹ ریزولوو کا مشاہدہ کیا جن میں ڈرونز، جدید نگرانی کے آلات، الیکٹرانک وارفیئر اور جدید کمانڈ اینڈ کنٹرول سسٹمز کا عملی مظاہرہ پیش کیا گیا۔
فیلڈ مارشل سید عاصم منیر نے جوانوں کے بلند حوصلے، پیشہ ورانہ مہارت اور عملی تیاری کو سراہا۔
جوانوں سے خطاب میں فیلڈ مارشل سید عاصم منیر نے کہا کہ مسلح افواج ملکی خود مختاری اور علاقائی سالمیت کے دفاع کیلئے ہمہ وقت تیار ہیں اور ہر قسم کے خطرات سے نمٹنے کی صلاحیت رکھتی ہیں۔
انہوں نے کہا کہ مستقبل کے میدانِ جنگ کے تقاضوں کے لئے ہر سطح پر اعلی درجے کی تیاری ناگزیر ہے۔
فیلڈ مارشل نے واضح کیا کہ مسلح افواج مختلف شعبوں میں بڑی تبدیلی کے عمل سے گزر رہی ہیں، دور حاضر میں جنگ کی نوعیت بدل چکی ہے، مستقبل میں ٹیکنالوجیکل جنگی صلاحیت جسمانی تدابیر کی جگہ لیں گے، ٹیکنالوجی کے استعمال کیلئے ذہنی تبدیلی وقت کی اہم ضرورت ہے۔
انہوں نے کہا کہ مسلح افواج تیزی سے جدید ٹیکنالوجی اپنا رہی ہیں، جس میں انوویشن اور انڈیجینائزیشن بنیادی ستون ہوں گے۔
بعدازاں فیلڈ مارشل نے روہی ای سکلز لرننگ ہب کا افتتاح کیا، روہی ای اسکلز لرننگ ہب جنوبی پنجاب اور ملک بھر کے طلبہ کیلئے ڈیجیٹل مہارتوں کے فروغ کے لیے قائم کیا گیا ہے۔
ترجمان کے مطابق فیلڈ مارشل سید عاصم منیر نے آرمی پبلک سکول عباسیہ کیمپس کا بھی افتتاح کیا اس موقع پر انہوں نے کہا کہ معیاری تعلیم اور کردار سازی کیلئے پاک فوج کا عزم برقرار ہے۔
فیلڈ مارشل نے ای ایم ای ریجنل ورکشاپ کا دورہ کیا جہاں انہیں جدید پلیٹ فارمز کی مینٹیننس، انڈیجینائزیشن اور جدید ٹیکنالوجی پر بریفنگ دی گئی۔
