پاکستانی شوبز انڈسٹری کی سینئر اداکارہ نوشابہ بی بی نے کہا ہے کہ انکی 12 سال کی عمر میں شادی ہوئی تھی اور 14 سال کی عمر میں وہ ماں بن گئی تھیں۔
پی ٹی وی کی معروف اداکارہ جہان سلطانہ جنہیں نوشابہ بی بی کے نام سے جانا جاتا ہے، ڈراموں میں پشتون کردار ادا کرنے کے حوالے سے کافی مشہور رہی ہیں، انکی پشتو ریڈیو اور پی ٹی وی سے وابستگی کئی دہائیوں پر محیط ہے، انکا تعلق سوات سے ہے اور وہ ہمیشہ ٹی وی پر سر ڈھانپ کر نظر آئی ہیں، مداح ان کی شائستگی اور خوش گفتاری کے معترف ہیں اور خیبرپختونخوا میں انکی بڑی فین فالوونگ ہے۔
حال ہی میں نوشابہ بی بی نے ایک ڈیجیٹل میڈیا چینل کو خصوصی انٹرویو میں کہا کہ مجھے ملازمت یا کیریئر کیلئے کوئی وقت نہیں ملا کیونکہ میری شادی 12سال کی عمر میں ہو گئی تھی اور اسی عمر میں میں نے ٹیلی وژن پر کام بھی شروع کر دیا تھا، میں گڑیوں سے کھیل رہی تھی کہ میری شادی کردی گئی، ایک دن مجھے بتایا گیا کہ گھر میں شادی ہے، بس مجھے ایک لپ سٹک دی گئی اور میں سب کچھ بھول گئی کیونکہ لپ سٹک میری کمزوری تھی۔
اداکارہ کا کہنا تھا میں خوشی خوشی سہیلیوں کے درمیان جا کر شادی کے بندھن میں بندھ گئی، اسوقت بچوں کو یہ بھی معلوم نہیں ہوتا تھا کہ شادی کیا ہوتی ہے، جب تمام مہمان چلے گئے تو میں نے اپنی بھابھی سے کہا کہ مجھے واپس گھر بھیج دیں، ہم دونوں کے درمیان عمر کا فرق 23 سال تھا وہ میرے خالہ زاد تھے اور اس شادی کیلئے میری خالہ نے ہی اصرار کیا تھا۔
انکا کہنا تھا کہ میں 14سال کی عمر میں ماں بن گئی، میرے تین بیٹے اور ایک بیٹی ہیں، میرے والد کافی سخت تھے، لیکن میرے شوہر نے میرے اداکاری کے کیریئر میں میرا بھرپور ساتھ دیا۔
