پاکستان اور میانمار نے دیرینہ تعلقات مزید مضبوط بنانے کے عزم کا اعادہ کیا ہے۔
جاری بیان کے مطابق وزیراعظم شہباز شریف سے میانمار کے وزیر خارجہ تھان سوی نے ملاقات کی، اس موقع پر نائب وزیراعظم و وزیر خارجہ سینیٹر محمد اسحاق ڈار اور معاونِ خصوصی طارق فاطمی بھی موجود تھے۔
وزیراعظم مہمان کا خیرمقدم کیا اور انسانی سمگلنگ کیخلاف کارروائی میں تعاون اور آسیان کیساتھ پاکستان کی شمولیت کیلئے میانمار کی حمایت کو سراہا۔
وزیراعظم نے تجارت اور معاشی تعاون، تعلیم، ثقافت، استعداد سازی اور عوامی روابط کے شعبوں میں تعاون کے فروغ کی اہمیت پر زور دیتے ہوئے میانمار کیساتھ دیرینہ تعلقات کو مزید مضبوط بنانے کیلئے پاکستان کے عزم کا اعادہ کیا۔
اس موقع پر میانمار کے وزیر خارجہ نے وزیراعظم کے پرتپاک استقبال پر شکریہ ادا کرتے ہوئے میانمار کی قیادت کی جانب سے نیک تمناؤں اور خیرسگالی کے پیغامات پہنچائے اور باہمی دلچسپی کے شعبوں میں پاکستان کیساتھ تعلقات کے فروغ کی خواہش کا اظہار کیا۔
تھان سوی نے 28مارچ 2025کو تباہ کن زلزلے کے بعد پاکستان کی بروقت امداد پر بھی وزیراعظم کا شکریہ ادا کیا۔
