آزاد کشمیر میں شدید برفباری کے باعث لینڈ سلائیڈنگ، برفانی تودے گرنے سے 11 گھر مکمل، 8 جزوی تباہ ہوگئے، ایس ڈی ایم اے نے پھسلن کے باعث شہریوں کو سفر سے گریز کی ہدایت کردی۔
سٹیٹ ڈیزاسٹر مینجمنٹ اتھارٹی کے مطابق آزاد جموں و کشمیر میں برفباری کے باعث رابطہ سڑکیں منقطع جبکہ نظام زندگی مفلوج ہو کر رہ گیا ہے۔
برفباری کے باعث لینڈ سلائیڈنگ اور برفانی تودے گرنے سے 11 گھر مکمل جبکہ 8 جزوی تباہ ہوگئے جبکہ باغ میں ایک شہری جاں بحق ہوا ہے۔
حکام کے مطابق مظفر آباد سے پیر چناسی شاہراہ برفباری کے باعث بند ہے جبکہ دارالحکومت سے وادی نیلم کی شاہراہ شاردہ تک بحال ہے۔
برف باری کے باعث بلند بالا علاقوں اور نیلم ویلی کی بند شاہرائوں کی بحالی کا کام تیزی سے جاری ہیے، ہٹیاں بالا سے وادی لیپہ جانے والی شاہراہ کو بھی داوکھن تک بحال کردیا گیا ہے۔
ایس ڈی ایم اے نے پھسلن کے باعث شہریوں کو سفر سے گریز کرنے کی ہدایت کی ہے۔
