امریکہ کی متعدد ریاستیں اس وقت شدید برفانی طوفان کی لپیٹ میں ہیں جس سے نظام زندگی مفلوج ہو گیا ہے اور درجہ حرارت منفی 49 تک گر گیا ہے جس کے نتیجے میں7 افراد ہلاک ہو گئے ہیں۔
غیر ملکی میڈیا کے مطابق واشنگٹن، نیویارک، ٹیکساس، اوکلاہوما اور نیوجرسی سمیت درجنوں ریاستوں میں شدید برفباری، بارش اور سرد ہواؤں کا راج ہے۔
نیویارک کے دیہی علاقوں میں درجہ حرارت منفی 49 تک پہنچ گیا اور شدید برفباری کے باعث 16 ہزار سے زائد پروازیں منسوخ ہو گئی ہیں، 8لاکھ سے زائد افراد بجلی سے بھی محروم ہو گئے ہیں۔
میڈیا رپورٹس کے مطابق 24ریاستوں میں ایمرجنسی نافذ کر دی گئی ہے اور 40ریاستوں کے 24کروڑ افراد متاثر ہونے کا خدشہ ہے۔
نیویارک کی گورنر کیتھی ہوچل نے کہا ہے کہ یہ کئی برسوں کا سب سے شدید موسم سرما ہے، نیویارک کے مختلف حصوں میں 8 سے 18انچ تک برف پڑنے کا امکان ہے اور عوام کو غیر ضروری طور پر گھروں سے نہ نکلنے کی ہدایت کی گئی ہے۔
غیر ملکی میڈیا کے مطابق واشنگٹن اور گردونواح میں 6سے 10انچ تک برف پڑنے کا امکان ہے جس کی وجہ سے وفاقی دفاتر بند بند کر دئیے گئے ہیں جبکہ سکولوں کو بند کر کے آن لائن کلاسز کا اعلان کیا گیا ہے۔
محکمہ موسمیات کا کہنا ہے کہ شدید برفانی طوفان کا اثر اگلے ہفتے تک جاری رہنے کا امکان ہے۔
